Shillong, Rymphang 05
U Myntri ka Sorkar Jylla uba dei ruh u nongaiktien ka Sorkar MDA u Bah Paul Lyngdoh u la buh jingkylli ha kano ka rukom kan ktah ïa ka jingtohkit haba weng ïa ki ophisar ba la shongthait haba ka Meghalaya Lokayukta ka la dep ban tohkit bad ‘chargesheet’ haba ïadei bad jingkynnoh pyrshah ïa ki kam bym dei ha Garo Hills Autonomous District Council (GHADC).
Haba ïakren bad ki nongthoh khubor ha ka Lah Sngi U Blei, u Bah Paul u la ong ba ka jingdawa jong ka VPP ban thung biang ïa kito ki dkhot ka Lokayukta kiba la shongthait kam long katkum ka aiñ bad ym lah ban pynkheiñ namar ka bor bad ka jingïadei ka la duna shibun lada ïanujor bad ki ophisar kiba dang don ha ka kam.
U la ong ban pynlong kam saiñ hima ïa kane da kaba ïalam bakla ïa ka jingmut jingpyrkhat ki paidbah kam long kaba dei bad ka long tang ban pynbiej ïa ki paidbah.
Nalor nangta u la ong ba ka Myntri ka Kong Ampareen Lyngdoh ruh ka la ïakynduh ïa ki nongïalam ka VPP kiba la pan ruh ban ïakynduh bad u Myntri Rangbah ka jylla ban ïakren halor kane ka mat bad u Myntri Rangbah ruh u la pynpaw ba u kloi ban ïakynduh ïa ki ha kano-kano ka por.
U Bah Paul u la ong ba ka jingdon ka Ïingdorbar ka dei ka rynsan ban ïatai sani bha halor kane, bad kane kan plie lad plie lynti ban ïakren ha Ïingdorbar.
U la pynshai ruh ba ka Lokayukta ka dei kaba long laitluid bad kam dei hapoh ka jingpeit jong ka Sorkar jylla, bad ka jingthmu ka long ba ka Lokayukta kan ai ïa ka jingbishar kaba hok.
Halor ka jingmih ki nongmihkhmat paidbah sha surok ban hylla ha ka jaka ban ïatai hapoh ka Ïingdorbar Thawaiñ, u Bah Paul u la ong ba ka Ïingdorbar Thawaiñ ka long ban ailad ïa ki nongmihkhmat ban ïatai, hynrei lada ïa ki paidbah kiba la jied ïa ki nongmihkhmat hap ban pynmih sha surok man ka por kam long satia ka lynti kaba dei.
U la ong ba ki paidbah ki la jied ïa ki nongmihkhmat na ki konstitwensi da kaba khmih lynti ba kin kren na ka bynta ka jingmyntoi jong ki ha Ïingdorbar Thawaiñ, hynrei lada ïalam ïa ki paidbah kiba jied sha surok na ka por sha ka por, kata ka mut ka jingdon ilekshon kam don jingmut.
U Bah Paul u la ong ruh ba ki nongïalam ka liang pyrshah ki don bun ka lad namar ki don ruh ki Committee bapher bapher ba la thaw da ka Assembly kum ka Public Account Committee (PAC) kaba khlaiñ bor bha bad ka dei ruh kaba la khlieh da u nongmihkhmat uba dei ruh na ka liang pyrshah.
