Shillong, Rymphang 05
Ka tnad pulit ka East Khasi Hills ka la kyrpad ïa ki paidbah ban long kiba husiar halor ka jingdon jong ki ‘riew shukor kiba kam ïalade kum ki nongtrei jong ki kompeni da ka jingthmu ban pynngop ïa ki ha ki rukom bapher-bapher.
“La ïoh jingtip ba ki ‘riew shukor ki la leh mynleh kum ki ‘agent’ jong ki kompeni phah tiar kum ka ‘FedEx’ bad kynjoh ruh sha ki nongshong shnong ba ki song kiba la wan ha ka kyrteng jong ki, ki don ïa ki mar ba la khaïi be-aiñ,” la ong u Superintendent of Police (City), East Khasi Hills, Bah Vivek Syiem ha ka kyrwoh khubor.
U la ong ruh ba nalor kane, kitei ki briew ki ju kynthup lang ïa kiwei da kaba pyndonkam ïa ka kyrteng jong ki kynhun tohkit jong ka Sorkar Pdeng kum ka Customs, CBI, NCB bad kiwei-kiwei kiba pyntip ba la pyndonkam ïa ki kyrteng jong ki briew na ka bynta ki kam pisa be-aiñ bad donkam ban pynkynriah bun ka pisa sha ka ‘account’ kaba ki kam ba ka dei na bynta ka jingïoh jingbit na ka RBI.
“Kum shi bynta ban pyntieng ïa ki briew, ki ju byrngem ruh ba kin sa shah kem. Ha kiwei pat ki bynta, la phah ïa ki briew ban pynrung ne ujor ‘online’ lyngba katto-katne ki ‘app’ kum ka ‘Any Desk’ bad kiwei-kiwei, hynrei ha kawei ka liang, ka ban pyndonkam kylla pat ban shet kylla ïa kito ki bym poi pyrkhat,” u la ong.
Kumta ka tnad ka kyrpad ïa ki paidbah ban ym pyndonkam ïa ki ‘app’ na kiba kum kitei ki briew.
Shuh shuh ka kyrwoh na utei u heh pulit ka la kyrpad ïa ki paidbah ban pynshisha shuwa lada ki la ïoh ‘phone call’ na ka bynta ka mar ka bym shym la phah wanrah bad lada ki ïoh jingtip halor kiba kum kitei ki jingjia, kin pyntip mar-mar sha ki thanad jong ki ban pyntikna ïa ka jingshisha khnang ba ki pulit kin ïoh leh ïa kaba donkam.
Ki paidbah ki lah ruh ban pyntip sha ka ‘Helpline’ jong ka tnad ‘Cybercrime’-1930 bad sha ka Police Control Room – 0364-2215427 bad 6009196479.
