Khliehriat, Rymphang:
Ka MLA ka thaiñ ka Kong Santa Mary Shylla ha ka 2 tarik Rymphang ka la plie ïa ki 5 tylli ki Areca Nut Processing Unit ne ki jaka saiñ ne shna ïa ki dop ‘wai kum ïa ki pliang, ki khuri ki lynhoh bad ki shamoit ha ka shnong Umkiang.
Nalor ka Kong Santa Mary Shylla la donlang ruh u Additional Deputy Commissioner, East Jaiñtia Hills Bah Gautam Warjri, District Project Manager, DPMU (Megha-LAMP) u Bah Hunlang Ioo Blah, ki nongïalam shnong, ki dkhot bad nongïalam ka Umkiang IVCS ki ban peit bad pynïaid ïa kine ki Arecanut Processing Unit.
Ïa kane ka Arecanut Processing Unit la bei pisa pura da ka Meghalaya Basin Management Agency (MBMA) lyngba ka District Project Management Unit (Megha-LAMP), East Jaiñtia Hills District kaba la sdang da ka bor pynïaid district jong ka East Jaiñtia Hills.
La ïathuh ba kine ki 5 tylli ki kor kin wanrah ïa ka lad kamai kajih bad ïoh kam ïoh jam haduh 200 tylli ki longïing bad kan pynmih ïa ka jingïoh noh kumba shi klur ha ka shisnem. Ïa kine ki mar ba pynmih na kine ki shnat la pynbeit bad kawei ka kynhun kaba na Assam ban pynïaid ïa kine ki mar bad lada jop kane ka kam ka bor district kan seng ha baroh kawei ka East Jaiñtia Hills District.
Ka Kong Santa Mary Shylla haba kren ka la pyrto ïa u Deputy Commissioner, East Jaiñtia Hills u Abhilash Baranwal, IAS uba la shim ïa ka sienjam ban sdang ïa kine ki karkhana saiñ dop kwai. Ka la ai khublei ruh ïa ki dkhot ka Umkiang IVCS ki ban long trai bad nongkhmih ïa kane ka processing unit ba kin long kiba shimkhia bad trei shitom na ka bynta ban pynïaid shakhmat ïa ka kam khnang ba kin lah ban ïeng ha la ki jong ki kjat.
Ha kajuh ka por ka Kong Santa ka la pynshlur ïa ki nongshong shnong khamtam ïa ki samla ban shim ïa kane kum ka lad kamai jakpoh bad kyntu ruh ïa ki samla ban shim kabu ïa ka scheme CM-ELEVATE bad kiwei kiwei ha ka ban seng ïa ki kam lajong.
La ïoh ruh ïa ka jingkren na u Arindam Dasgupta, Co-Founder, CEO jong ka Tamul Plate Marketing Private Limited, Barpeta Assam. U la ong ba kine ki sla dieng kwai ki shu sepei bad hap ha madan, hynrei da ka jingdon kane ka unit bad da ka jingïatreilang bad ka MBMA bad ka Umkiang IVCS yn shna ïa ki pliang, ki lynhoh bad ki shamoit ban kyntiew ïa ka ïoh ka kot ka shnong Umkiang.
Ïa ka prokram la pynïaid da u Raplem Pohduna, Secretary Umkiang IVCS, ïa ki kyntien pdiang sngewbha la ai da u Bah Lasting Pala, Waheh Shnong Umkiang bad ïa ki kyntien ai khublei la ïoh na u Bah Stanly Lamin, Chairman Umkiang IVCS.
