Tura, Rymphang 05
Ha kawei ka jingjia ha ka Sngi U Blei, lai ngut ki briew ba la suba ba ki dei ki nonglute ki la shah bom shnong ha Jaluagre (Mangsang Gittim) kaba don ha South West Garo Hills. Na kane ka jingjia, arngut ki la khlad katba uwei u dang don hapdeng ka jingshah sumar ha Civil Hospital, Tura.
Katei ka jingjia ka la paw pyrthei hadien ba ki pulit ka South West Garo Hills ki la ïoh jingtip na ki nongshong shnong ka Jaluagre (Mangsang Gittim). Mar ïa ïoh jingtip, ki pulit na Garobadha ki la leit sha katei ka shnong bad pyllait ïa kitei ki lai ngut na kti jong ki paidbah.
Hynrei ha katei ka jingjia, u Balen G Sangma, 30 snem ka rta, bad u Sken D Shira, 30 snem ka rta, ki la khlad noh katba ki dang shah sumar ha Garobadha PHC. Sa uwei pat ïa uba la tip kyrteng kum u Betuwel D Shira, 22 snem ka rta, u dang don hapdeng ka jingshah sumar ha Civil Hospital, Tura.
Na ka jaka ba kitei ki lai ngut ki la shah shoh, la ïoh ban kurup ïa kawei ka kali Maruti Car 800, ki dieng ki siej kiba la khah snam, kawei ka Mobile Phone kaba la julor, kawei ka wait, ka muhor jong u Chairman ka seng ba la ai kyrteng United Garo People Forum (UGPF), ki kot jingpynithuh bapher-bapher, pisa kaba don T. 1700 bad ka kot kaba la thoh ïa ki kyrteng jong ki nongkitkam ka UGPF. Ïa kine ki tiar ki tar la kurup noh da ki pulit.
Ïa ka met kaba sah jong kitei ki arngut la pynkynriah sha Civil Hospital, Ampati ban leh ïa ka post-mortem katba na ka liang ki pulit ki la pynrung da ka ejahar ha thanat Ampati bad ka jingtohkit ka la sdang.
Katkum ka khubor na ki pulit, ar ngut na kitei ki lai ngut kiba la shah shoh ki dei kiba la shah kem teng halor ka jingkynnoh ba ki la donkti ban pynïap briew, rahbor, dawa pisa bad jingpynkheiñ ïa ka Arms Act ha South West Garo Hills.
Na ka liang u SP ka South West Garo Hills, u Vikas Kumar, u la kyntu ïa ki paidbah ba kim dei ban shim ïa ka aiñ halade. U la ong ba lada ki paidbah ki don jingtip halor ki runar, ki dei ban pyntip sha ki pulit bad ki pulit kin ym ïathuh ïa ki kyrteng jong ki bad ha kajuh ka por, yn ai buskit ruh ïa ki.
