New Delhi, Rymphang 05
Ka Sorkar Pdeng ha ka Lah Sngi U Blei ka la wanrah ïa kawei ka aiñ rew ha Lok Sabha ka ban teh lakam ïa ki jingleh thok ha ki eksamin pynrung kam kum ka jinglait tuh ki kot jingkylli bad ka jingmih ki ‘website’ ba shukor. Katkum ki kyndon jong kane ka aiñ, kiba shah kem ki lah ban shah set patok haduh lai snem ha ryngkat ka jingsiew ïa ka kuna kaba T. 1 klur.
Katei ka aiñ rew ka dei kaba la ai kyrteng “The Public Examinations (Prevention of Unfair Means) Bill, 2024” bad la wanrah da u Myntri Sorkar Pdeng, u Dr Jitendra Singh, ha ka Dorbar Mang Tyngka kaba dang ïaid mynta.
Katkum kane ka aiñ, ki kyndon jong ka kin treikam ha kaba ïadei bad ka jingpynrung kam ha ka Union Public Service Commission, Staff Selection Commission, Railway Recruitment Boards, Institute of Banking Personnel Selection, ki tnat treikam jong ka Sorkar Pdeng bad ki shnat jong ka, National Testing Agency, bad kiwei-kiwei katkum ka jingkdew jong ka Sorkar Pdeng na ka por sha ka por.
Haduh mynta, kam pat don kano-kano ka aiñ kaba ïadei beit thik bad ka jingïakhun pyrshah ïa ki kam leh shukor ha ki eksamin pynrung kam jong ka Sorkar Pdeng.
U Dr Jitendra u la ong ba katei ka aiñ rew kan long kum ka nongmuna na ka bynta ki sorkar jylla ban pyntreikam katkum ka jingsngewbit ka jong ki. Hynrei u la ong ba ka aiñ kaba kum kane kan khanglad ïa ki runar ba kin pynthut ne pynjakhlia ïa ki eksamin pynrung kam ha ki jylla.
