Shillong, Rymphang:
Ha ka jingïakynduh lang ka ban sah kynmaw na ka bynta ki nongïalam jong ki karkhana bapher bapher bad kumjuh ruh bad kito ki stad bashem ïa ki buit treikam thymmai, ka lympung INDIAWOOD 2024 ka la long ka lympung kaba la pynkhreh ban pyninam ïa ki kor ki bor bad ki tiar ki tar kiba biang ba bit bad katkum kane ka juk stad ba mynta ha kaba ïadei bad ka jingshna ïa ki tiar ki tar ba la shna na ki dieng ïa kaba yn sa pyni ha Bangalore International Exhibition Centre naduh ka 22 haduh 26 traik u Rymphang, 2024. Ha katei ka lympung yn don haduh 950 tylli ki kompani na ki 50 tylli ki ri, bad ka jaka ban pynlong ïa kane ka lympung jingïalang ka heh haduh kumba 75,000 Square Meter tam, kaba pynlong ruh ïa kane ka lympung kum ka lympung baheh tam ha ka histori ha kine ki 13 snem ba la pynlong ïa ka.
Ka INDIAWOOD 2024 kan long kum ka jaka pdeng jong ka jingïakynduh jong ki 75,000 ngut ki nongkhaïi, bad kiban wanrah ïa ki jingtyrwa ki ban ïadei bad ki lad ki lynti bad ki buit treikam thymmai bad kumjuh ruh kan long ka lympung ba ki nongïashim bynta kin lah ban pynïar ïa ka jingiadei bad kiwei pat. Ha kane ka lympung jingïalang yn don shibun ki bynta kiban ai jingmyntoi kum ki lympung ïamir jingmut, ki lympung ai jinghikai, bad lympung jingïakren ïa kaba yn lam khmat da ki riew shemphang, khnang ba yn nang lah shuh shuh ban saiñ dur ïa ka kam ha kaba ïadei bad ka jingshna ïa ki tiar dieng bad ki jingbuh jingsat da ki dieng.
Da kaba buh ha khmat ïa ki lad ki kabu ba lah ban ïoh na ki ri ka pyrthei ha kaba ïadei bad ki tiar ki tar bad ki jingbuh jingsat ba la shna da ki karkhana shna tiar dieng ha India, kane ka lympung ka ïahap ruh bad ka sienjam treikam ba dang shen jong ka sorkar kum ka National Transit Pass System bad ka Indian Forest & Wood Certification Scheme “PRAMAN.” Ka jingthmu jong kine ki jingpyrshang ka long ban nang kham pynsuk shuh shuh ïa ka khaïi pateng bad ban nang kyntiew ïa ka kam ban shalan ïa ki mar ki mata bad ki tiar ki tar ba la shna da ka dieng shabar ri.
Ka Sonia Prashar, Managing Director jong ka NuernbergMesse India, ka la ban jur halor ka jingdonkam jong ka INDIAWOOD 2024, da kaba ong, “Kane ka lympung jingïalang kaba yn sa pynlong ym tang ba ka dei kaba heh tam hynrei ka pynpaw ruh ïa ki sienjam ba radbah ba la shim na ka bynta ban pyniar ïa ka kam bad ban nang lah shuh shuh ban pynmih ïa ki tiar ki tar bad ki kor ki bor teknologi.”
Kane ka lympung kan khring ïa ki nongïashim bynta na ki jingtrei bad ki kam bapher bapher, kynthup naduh kito kiba shna bad pynmih ïa ki jingbuh jingsat da ki dieng bad ki tiar ki tar ba pyndonkam ha kamra shetja, ki Architect, Interior Designer, bad ki nongkhaïi dieng sawdong, bad kane ka lympung kan long shisha ka lympung kaba yn ïakhleh lang baroh ki briew kiba tbit bad shemphang ha kaba yn lah ban ïasam jingtip bad pyni ruh ïa ki buit treikam thymmai. Ki ri ka pyrthei ba kynthup ïa ka ri Germany, Italy, bad USA kin ïashim bynta lyngba ka rynsan jong ki nongpynïaid, khnang ba yn nang pynlong shuh shuh ïa kane ka lympung kum ka lympung jingïalang ka pyrthei.
U Luigi De Vito, President jong ka Eumabois, u la pynpaw ïa ka jingsngewkmen shaphang ka lad bad ka kabu ha kaba ïadei bad ka ïew ha India na ka bynta ban wanrah ïa ki lad ki lynti treikam katkum ka juk stad ba mynta bad ban lah ban pyndonkam ïa kine ki jingstad na ka bynta ban pyndap ïa ki jigndawa jong ka pyrthei ha kaba ïadei bad ki jingshna.
Nalor ka INDIAWOOD, sa kiwei pat ki jingpyninam kum ka India Mattresstech & Upholstery Supplies Expo, Wood+ in Architecture & Design, kin wanrah ka jingtyrwa ban pyni ïa ka jingshna ïa ki tynsok, ki jingshna ba itynnad ba la shna da ki dieng, bad ki jingbuh jingsat ba buh ban pynitynnad ïa ki ïing ki sem bad kumta ter ter.
U Sivakumar Venugopal, Group Director of NuernbergMesse India, haba kren shaphang ka INDIAWOOD, u la ong, “Ka long kum ka phliah ding na ka bynta ban nang kyntiew shuh shuh ïa ki karkhana, ka [INDIAWOOD] ka ïai bteng ban nang kham pynbha shuh shuh ïa ka rukom saiñdur ïa ka jingpynmih ïa ki tiar ki tar bad ki jingshna da ki dieng, ïa kaba la leh da kaba pyndonkam ïa ki kor ki bor teknologi bad ka jingtrei ba radbah ban nang kham pynbha shuh shuh ïa ka lawei ki karkhana.”
