Shillong, Rymphang 05
Ka Bharatiya Janata Party (BJP) ka la thaw thymmai ïa ka shnat treikam jong ka Shillong City District kum shibynta ban pynkhlaiñ ïa ka seng ha ka ilekshon MP shapoh ka Lok Sabha ka ban sa long shen.
Ka seng lyngba u kyrwoh ka la pynpaw ba ka ngeit skhem ba kan lah ban khur kham bun ka ‘vote’ napoh ka nongbah jong ka jylla ha ka ilekshon Lok Sabha ka ban sa long shen.
Ha ka kyrwoh sha ki lad pathai khubor ba la pynmih ha ka 5 tarik u ‘nai Rymphang 2024 da ka seng, u nongaiktien jong ka seng, u Bah Mariahom Kharkrang u la shah jied ban long kum u President ka City Unit. Katba u State Secretary bad u nongïarap napoh ka South Shillong, u Bipen Pradhan pat u la shah jied kum u nongkhmih ïa ka Shillong City khnang ba yn lah ban pynkhlaiñ bad ban ïoh khur kham bun ka ‘vote’ napoh ka nongbah.
Kitei ki nongkitkam kiba la shah thung kam thymmai hapoh ka distrik ki la shah pynkupburom ha u State President ka BJP, u Rikman G. Momin uba la buh ruh ïa ka thong ba ka seng kan sa ïoh 1 lak ‘vote’ napoh ka Shillong City.
Shuh shuh ka seng lyngba u Bah Kharkrang, u Pradhan lem bad kiwei kiwei ki ‘riew pawkhmat jong ka seng kin sa leit ban ïalap ilekshon sha kylleng ki konstitwensi hapoh ka nongbah Shillong naduh la shem taïew ban pynkhlaiñ ïa ka seng.
