Shillong, Rymphang 06
Ka Delimitation Committee jong ka Khasi Hills Autonomous District Council (KHADC) ban pynbeit thymmai ïa ki 29 tylli ki konstitwensi ka la ïoh ïa ka Electoral Roll na ka sorkar jylla lyngba ka shlem treikam ka Deputy Commissioner, East Khasi Hills District haduh 15 tylli ki konstitwensi bad kaba sah mynta kin ap sa ïa ka Sohra bad Shella konstitwensi kiba dei ki konstitwensi kiba hap ha East Khasi Hills District.
Ïa kane ka Delimitation Committee la khlieh da u Dr. S Kharsyiemlieh uba dei u nongbishar ba la shongthait ka District Council Court kum u Chairman bad u Bah M. Kharkrang kum u Secretary uba dei ruh u Secretary barim ka KHADC. Kat ïa mynta kane ka committee ka dang pynlong ka jingbishar bniah ïa ki konstitwensi kiba bun briew bad ki konstitwensi kiba duna briew.
Haba ïakren bad u Secretary ka Delimitation Committee u Bah M. Kharkrang u la ïathuh ba haduh mynta ki dang ïoh tang 15 tylli ki electoral roll na ka sorkar jylla na shlem treikam ka DC East Khasi Hills katba ka Sohra bad Shella kim pat ïoh.
U la ïathuh ba kiwei kiwei ki district kum na Ri Bhoi, West Khasi Hills District, South West Khasi Hills, Eastern West Khasi Hill ki dang ap haduh mynta.
U la ïathuh ba na ki 29 tylli ki konstitwensi ki la ïoh 15 tylli, kaba mut ki dang sah sa 14 tylli hynrei kin dang leit ban bishar noh ïa kine ki 15 tylli kiba la ïoh na East Khasi Hills District.
Haba ïadei bad ka shnong Mawpat, ka Delimitation Committee kan hap ban shong bishar bha namar mynta ka shnong Mawpat ka kwah ba ka Umsawli kaba dei hapoh ka jingpeit jong u Rangbah Shnong Mawpat kin hap lang ha kajuh ka konstitwensi.
Namar ka Umsawli kaba hap ha u Rangbah Shnong Mawpat ki thep ‘vote’ ha ilekshon MDC ha Laitumkhrah-Malki katba ka Mawpat ka thep ‘vote’ ha Mawlai.
La sngewthuh ba ka Delimitation Committee kan sa rah lang noh ïa ka shnong Mawpat bad ka Umsawli sha Pynthorumkhrah konstitwensi namar ka Mawlai ka dei ka konstitwensi kaba la bun briew tam.
Kum ban shu pynkynmaw, ka jingthaw ïa ka Delimitation Committee kadei namar ki don ki konstitwensi kiba la duna briew palat bad don ki konstitwensi kiba la bun briew palat katba ka jingsam skhim sha ki MDC ka long mar katjuh.
