Nongpoh, Rymphang:
Ka Ri Bhoi Peoples’ Council (RBPC) lem bad ka Meghalaya Peoples Social Organisation (MPSO) ka la dawa ba ïa ka risol jong ka eksamin thungkam DSC dei ban pynmih noh hapoh ka taïew ba nyngkong jong u ‘nai Lber.
Ka RBPC bad ka MPSO haba pynpaw ïa ka jingsngewkhia halor ka jingpynslem jong ki bor pynïaid District ban pyllait noh ïa ka risol jong ka eksamin thungkam ka District Selection Committee ka Ri Bhoi kaba la pyndep naduh u snem 2021-2022, ka la byrngem lada ki bor district kim shimkhia, na ka liang ka seng kin hap ban shim da kiwei pat ki lad ki lynti.
Ha kaba ïadei bad kane, ki nongïalam jong kitei ki ar seng ki la leit ruh ban ïakynduh bad ai jingthoh sha u Deputy Commissioner ka Ri Bhoi u Arpit Upadhyaya ha ka Lah Sngi U Blei ban kyntu ba u dei ban shimkhia mardor ban pynmih noh ïa ka risol jong katei ka eksamin thungkam ha ka district.
Haba kren sha ki lad pathai khubor hadien ka jingkynduh ïa u DC, u Bah Jason Lennox Nongrum, President ka RBPC, u la ïathuh ba na ka liang jong ka seng, ka la ïoh ïa ka jingujor kaba bun na ki samla nongthep kam kiba la sah ha ka umdum halor ka jingpynslem jong ki bor pynïaid district ban pynmih ïa ka risol thungkam jong ka DSC kaba la dep ban pynlong naduh u snem 2021-2022.
U Bah Nongrum u la pyntip ruh ba na ka liang u DC ka Ri Bhoi u la pynshai ba na ka liang ka jong u, u la dep ban leh ïa la ka kamram bad ka jingsahteng ban pynbna ïa ka risol ka dei namar ki tnat treikam bapher bapher kim pat lah ban phah ka roster system sha ki bor ba dei khmih katkum ka Reservation Policy.
U la pyntip ruh na ka liang jong ki nongïalam ka RBPC lem bad ka MPSO ki la ai jingmut ruh ba u Deputy Commissioner u dei ban ai ïa ka jingpynshai paidbah halor katei ka jingpynslem ban pynmih ïa ka risol bad ruh ban buh de ïa ka tarik kaba thikna lano yn pynmih ïa katei ka risol kaba ki samla thep kam ki la ap khmih lynti la bun snem.
Shuh shuh u Bah Nongrum u la dawa ba ki tnat treikam sorkar ki dei ban pyndep ban phah noh ïa ka roster mynta hi u ‘nai Rymphang katba ïa ka resol pat ki bor pynïaid district ki dei ban pynmih noh ha ka taïew ba nyngkong jong u ‘nai Lber lym kumta na ka liang ka RBPC bad ka MPSO kim banse ban shim da kiwei ki lad ki lynti ban pynbor ïa ki bor pynïaid district ba kin hap ban leh ïa kaba donkam na ka bynta ka jingmyntoi jong ki samla thep kam.
