Shillong, Rymphang:
U nongïalam ka Liang Pyrshah jong ka ïingdorbar thawaiñ ka Jylla u Bah Ronnie V Lyngdoh ha ka Lah Sngi U Blei u la pynpaw ïa ka jingsngew ïahap ban pyntreikam ïa ka National eVidhan Application (NeVA) ban pynlong ïa ka dorbar jong ka ïingdorbar thawaiñ kaba lait na ka jingpyndonkam ïa ki kot ki sla.
Ha kaba ïadei bad kane, u nongïalam ka Liang Pyrshah u la ïoh ïa ka jinghikai ha ka Lah Sngi U Blei kumno ban pyndonkam ïa ka NeVA da ki ophisar na ka IT Cell ka Meghalaya Legislative Assembly Secretariat kaba long ha kamra jingïalang jong ka Administrative Block ka Meghalaya Assembly ha Khyndailad.
U Bah Ronnie u la pynpaw ka jingsngewnguh ïa u Lamphang ka ïingdorbar thawaiñ u Thomas A Sangma lem bad ki ophisar jong ka Assembly Secretariat halor ka jingshimkhia ban pyntreikam ïa ka National eVidhan Application. U la ban jur ba kane ka sienjam kan shim ïa ka bynta kaba don jingmut bha ha kaban ïada bad pynneh pynsah ïa ka mariang.
Shuh shuh u la kdew ruh ïa ka jingtreikam bha jong ka ‘Application’ namar ka dei ruh kaba lah ban pyndonkam ha kaban phah ïa ki jingkylli bad ki jingpynbna (notice).
Lah ban kdew ba kane ka ‘Application’ ka don ïa ka sla ba la shna kyrpang tang na ka bynta iwei-pa-iwei dkhot jong ka ïingdorbar ba kin phah ïa ki jingkylli bad ki jingpynbna.
