Mawkyrwat, Rymphang 06
U nongïalam barim ka HYC uba bat ïa ka kam Vice President jong ka HYC South West Khasi Hills District bad President HYC South Lyngngam Circle u Bah Mandilos Nongbri u la pynïasoh noh ïalade sha ka seng NPP.
Kane ka jingpynïasoh NPP jong u Bah Mandilos ryngkat lem bad spah ngut ki nongbud jong u ka la long ha ka 6 tarik u Rymphang 2024 ha ka jingïalang jong ka NPP Ranikor Block Committee kaba la long ha Community Hall Rangthong South West Khasi Hills District.
Ha kane ka sngi la wan ban pdiang burom ïa u Bah Mandilos Nongbri da u State Working President ka NPP u Bah Hamletson Dohling ryngkat ka jingdonlang ka Kong Ampereen Lyngdoh, ka kyrtong MP na Shillong Parliamentary, u Bah Macmillan Byrsat MLA barim ka Nongstoin, Bah Auspicios Lyngdoh State Secretary NPP, Bah Kitborlang Nongrem, President NPYF, Bah HS Diengdoh lem bad kiwei kiwei.
Ka Kong Ampareen Lyngdoh kaba dei ka kyrtong MP na Shillong Parliamentary Seat, ka la ïoh ban pynithuh ïalade bad ban pan jingkyrshan na ki palat hajar ngut ki nongkyrshan ka NPP Ranikor Konstitwensi ban pynjop donburom ïa ka ha kane ka MP ilekshon.
“Jied ïa nga lada phi don ka jingkyrmen, nga dei manga ka ban leit ïasaid na bynta jong phi ïa ki aiñ ha Delhi,” la ong ka Kong Ampareen bad ka la ong ruh ba dei tang ka NPP kaba lah ban kren da kaba shai bad ka nongrim kaba skhem ïa ki nongsynshar ha Delhi.
“Ka jaidbynriew jong ngi ka long kaba rit paid bad bun ki niam, yn nym don mano-mano ba lah ban beiñ ne ban ïuhroit bad dei ka NPP ka ban lah ban ïada lada don kum kita ki aiñ kiba la ïuhroit ne ki jingpynkylla na Delhi,” ka la ong.
Ka Kong Ampareen ka la ong ruh ba ka long kaba eh haduh katta katta ban pynsawa ne kren hakhmat 500 tam ki MP namar iwei i sur i lah ban jah, hynrei ka la pynpaw ïa ka jingskhem jingmut ba kan kren bad ïeng rangbah lada don ki jingpynkhihwin ïa ka jaidbynriew.
Kumta ka la kyntu ïa ki paidbah ba lada ki jied ïa ki MP, ki dei ban jied ïa ki kyrtong ba la pynïeng da ka NPP kaba dei trai da ka sorkar MDA-2. Nangta ka la pynpaw ruh ïa ka jingsngewskhem ba kumba ki nongïalam ka seng NPP ki la jied bad ibit ïa ka ban shim ïa kane bynta, ka la kular ba kan nym phai dien bad leh ïa kaba bha tam.
Katba na ka liang u Bah Hamletson Dohling ha kane ka sngi u la ïoh ban pynskhem ïa ki nongkitkam ka NPP Ranikor Block Committee bad ki nongkitkam ki long u Nelby Sangma President, Mandilos Nongbri Working President lem bad 34 ngut ki dkhot ka exeutive committee.
U Bah Mandilos Nongbri haba ai jingkren u la ïathuh ba naduh mynshwa u ju sngewtynnad ban shakri ïa ka imlang sahlang hapoh shnong pohthaw kumjuh ruh ha ki kam seng. U la ïathuh ruh ba ka jingrung jong u sha ka saiñ hima-sima bad ka seng NPP ka dei namar u don ka jingshaniah ïa kane ka seng bad don ruh ïa ka jingangnud ban shakri khambha shuh ïa ka dong ka thaiñ.
