Shillong, Rymphang 06
U Myntri ka tnat bording, u A T Mondal u la ong ba ka jinglong jingman ha ka liang ka bording ka long kaba dang biang wat la dang hap ban shaniah tylli ha ka bording kaba pynmih na ki projek kiba shu den ne ka dam.
U Mondal u la ong ba haduh mynta ka jingpynmih bording ha kane ka Jylla ka dei kaba shaniah tylli-tyllan da kaba shu den ïa ki wah (hydro electric project).
Kumta u la ong ba ka Sorkar Jylla ka thaw ki lad ki lynti kumno ban pynduna ïa ka jingpynlip bording bad ha kano ka rukom ban ïaid ïa ka jingpynlip bording.
U Myntri u la ong ba ka projek pynmih bording kaba 3 mega watt ha Riangdo ha West Khasi Hills ka dang ïaid khnang ban pynmih bording ilektrik kaba long ka jingïarap ïa ka Jylla.
U la ong ruh ba ka don ka lad ban kham pynkiew ruh ïa ka jingpynmih bording ilektrik sha ka 6 mega watt bad ïa kane, ka Sorkar ka dang khmih bniah kumno lah ban leh ïa kane.
Shuh shuh u Mondal u la ong ba ka Detailed Project Report (DPR) la nang pynkhreh ban pyntreikam ïa ki projek kiba rit.
U la ong ba ïa mynta dang peit bniah ïa kane ha kano ka rukom lah ban pynïaid shakhmat bad nangno ka jingbei pisa kan wan.
Nalor kane, ka don ruh ka jingpyrshang ban pynmih ïa ka bording da kaba tan na ka sngi lane solar plant.
