Shillong, Rymphang 06
Ka Voice of the People Party (VPP) ka la ong ba ki jingkynthoh pyrshah ïa ka seng na ki seng saiñ pyrthei bapher-bapher ka dei namarba ki don ka jingsheptieng ïa ka seng kaba la nang ïoh jingkyrshan na u paidbah katba nang mih ki sngi.
“Kane ka dei ka jingtieng ïa ka VPP namar ka seng ka shim ïa ki mat kiba ktah ïa u paidbah. Mynta ki tieng ïa ka saiñ pyrthei kaba kham pher jong ka seng kaba ka leit ban pynsngewthuh paidbah ha man la ki jaka,” la ong u nongaiktien ka VPP, Dr. Batskhem Myrboh haba jubab halor ki jingshah kynthoh ka seng ha ki seng saiñ pyrthei bapher-bapher.
Halor ka jingong ba ka saiñ pyrthei mynshuwa khlem ka pisa ym long, u Dr. Myrboh u la ong ba ka seng kam ngeit satia ba ki paidbah ki long kiba bamsap hynrei dei ba ki shah ïalam bakla ha ki seng saiñ pyrthei bad ki nongïalam.
“Ngi kwah ban pynbeit ïa kane ka rukom long ka saiñ pyrthei. Ki paidbah ki long kiba bha hynrei dei ba ki shah ïalam bakla,” u la ong.
Haba kdew ba ka kamram jong ka seng ka long ban wanrah ïa saiñ pyrthei kaba bha, u Dr. Myrboh u la ong dei namar kane ba ka seng ka ïoh jingkyrshan na ki paidbah.
“Kiwei-kiwei ki seng saiñ pyrthei ki tieng ïoh ba ka saiñ pyrthei jong ka VPP kan urlong (ïa kaba kan sa urlong). Ka saiñ pyrthei jong ki ka long ban shna dhara, ai bai skul, bai dawai, hynrei ki klet noh ïa ki mat ba shisha ba ïadei bad u paidbah – ban lait na ka bamsap, ban ïoh ïa ka pule-puthi kaba paka, ka koit ka khiah, ka jingkyrshan ha ka liang ka rep ka riang nalor kiwei-kiwei – kim leh ïa kine,” u la ong.
Shuh shuh haba ban jur ba ka kam saiñ pyrthei ka dei ka jingshakri ïa u paidbah, u nongaiktien ka seng u la ong ba ki paidbah ki pynïasoh sha ka VPP naba ki ngeit ba ka saiñ pyrthei kam dei ka kam shimet jongno-re-jongno.
