Shillong, Rymphang 06
Ka jingdon ki jaka naduh ki lum ki wah ym tang ka wanrah ka jingitynnad ïa ka mei mariang hynrei ka khring ruh ïa ki nongjngoh kai pyrthei bad ka lad ai kam ai jam ïa ki khun samla.
Ka jingitynnad ka jingrwai “To Wan Baieid” na ka phlim ‘Jingim’ kaba la leit ringdur ha Umkhakoi kaba hap hapoh ka jingpeit jong ka shnong Mawlyngbna, kaba hap ha Mawsynram Block, East Khasi Hills District ka la khring shisha ïa ki nongjngohkai pyrthei ym tang napoh ka jylla hynrei na kylleng ki ri ka pyrthei namar kane ka jaka jngohkai pyrthei ka don ïa ka pung kaba heh palat 600 meter bad ki don ki mawsiang kiba long kum ki dabor kiba dap um ha ka por slap.
Ïa kane ka jaka jngohkai pyrthei la sdang ban tei nyngkong ha u snem 2007 bad la kham pynbha ha u snem 2013 kaba la sdang ban khring bha ïa ki nongjngohkai pyrthei mar shu pyllait ïa ka jingrwai “To Wan Baieid” na ka phlim ‘Jingim’ ha u snem 2019 ba la ringdur da u Kiki Garod bad la ak da u Phira Dohtdong bad Wanri Pyngrope.
Haba ïoh ban buddien biang ïa kane ka jaka jngohkai pyrthei ha kine ki sngi, la ïoh ban ïakren bad ki nongap ïa kane ka jaka kaba ki la ïathuh ba ka por ba ki briew ki wan shangkai pyrthei ka bun bha ha ka por tlang kata naduh u bnai Nohprah haduh u bnai Rymphang man u snem.
Ki la ïathuh ba ki briew ki kham bun bha kiba wankai ki dei ha ka sngi shuti bad sngi saitjaiñ.
Ki la pynpaw ka jingsngewkmen ba na kane ka kam jngohkai pyrthei la kam palat 40 percent ïa ki samla jong ka shnong.
Shuh shuh ki la pyntip ba ha ka por lyiur ki bun kiba wan na bar jylla bad ki wan ïalam hi ïa ki nongbatai.
Ha kane ka Umkhakoi ki paidbah kiba wan da ka bos bad kali rit kiba bun ki wankai ban shet artad ban bamkhana bad leit iaid kai pyngngad ha ka pung.
Na ka liang kiba shong die dukan habar jong kane ka pung Umkhakoi ki la ïathuh ba ban ïa kaba leit bylla sngi ki la kham im ja da kaba die ki jingbam khutia ia kiba wan jngohkai pyrthei.
