Shillong, Rymphang 06
U Myntri Rangbah ka Jylla, u Conrad K. Sangma, ha ka Sngi Ba-ar u la sam ïa ki shithi thung kam sha 346 ngut ki nonghikai skul LP ha ka jingïalang kaba la long ha State Convention Centre, Shillong ha ka jingdonlang u Myntri ka tnad pule-puthi, u Rakkam A. Sangma.
Haba ai jingkren ha ka jingïalang, u Sangma u la ong ba ka jingïalang kam dei tang halor ka jingsam ïa ki shithi thung kam sha ki nonghikai thymmai ki ban hikai ha ki skul LP hynrei ka jingrakhe ban ïasam ïa ka jingïohi jngai bad ka jingangnud jong ka Sorkar Jylla.
“Ngi baroh ngi long shi bynta jong kajuh ka kynhun mynta, ngi lah ban leh ïa kiei-kiei kiba pher ha ki kyrdan bapher-bapher, hynrei ngi don hangne ban kynjoh ïa kajuh ka thong – kata ban ïalam shakhmat ïa ka Jylla,” u la ong.
U la ong ruh ba ka jingpynlut haba phai ha ka liang ki nongtrei barabor ka long ka jingpynlut kaba heh.
“Na bynta ka Jylla kaba don ïa ka thong, ka jingpynlut ha ki jaka ba dei, kata ki nongtrei ka long kaba donkam khnang ban lah kynjoh ïa ki jingthmu bad ba ngi trei ha ka rukom ka juk stad saïan,” u la bynrap.
Na ka liang u Myntri Rangbah u la kyntu ruh ïa ki nonghihkai thymmai ban sdang ïa ka kam jong ki da ka jingmut-jingpyrkhat kaba beit bad ba kum ki nonghikai ym tang ba kin sam ïa ka jingtip ha ka liang ka pule-puthi, hynrei ba kin wanrah jingkylla ha ki jingim jong ki khynnah hapoh ka jingkhmih jong ki.
U la ong ruh ba katba ka Sorkar ka pynlut bun na bynta ka jingmanbha ki jingdon-jingem ha ka liang ka pule-puthi, hynrei ka jingïadei ka long kaba kongsan eh da kaba bynrap, “Ngi la tei ïa ki ïingmala bad ki jingdon-jingem hynrei ïa ka jingnang-jingstad dei ma phi ki ban sam bad dei ma phi ki ban tei ïa ka lawei jong ka Jylla bad ka ri. Kumta dei ma phi ki ban wanrah jingkylla.”
U Myntri ka tnad pule-puthi, u Rakkam A. Sangma, ha ka jingkren jong u, u la ong ba ka kam hikai ka dei ka dei ka kam kaba don burom tam bad ong, “Katba phi dang ïaid shakhmat bad ka kam ba la bynshet ha phi, shakri ha ryngkat ka jingminot naba phi don ka bor ban wanrah jingkylla, kumta ngi phah ïa phi ha ryngkat ka jingkyrmen skhem ba phin tynrong lem ïa ka jingthmu bad ka jingkitkhlieh lem bad ka Sorkar.”
Shuh shuh u Myntri u la maham ïa ki ban long kiba husiar haba ïadei bad ka jingleh shukor ha ka kam da kaba thung kylla ïa kiwei pat naba ka ktah ïa ka jinglong-jingman jong ki khynnah ha ka jingpule bad ïapeiñ ruh ïa ka pule-puthi kaba paka.
U Myntri Rangbah lem bad kiwei-kiwei ki la pyllait ruh ïa tiar donkam ba ïadei bad ka jinghikai ba la tip kum ki ‘Jadui Pitara’ na bynta ki khynnah rit ki bym pat pynïasoh sha ki skul.
Kumba 35,000 ngut ki khynnah kin sa ïoh pdiang ïa kine ki tiar lyngba ki nonghikai LP mar sien long skul.
Kine ki tiar ki dei ki synduk ki ban kynthup ïa ki jingdonkam ha ka jingpule ba sdang jong ki khynnah na bynta ka samoi pule baroh shisnem.
