New Delhi, Rymphang 06 (UNI)
Ka ïingdorbar Lok Sabha ha ka Sngi Ba-Ar ka la ai jingmynjur ïa ka aiñ rew ban ïakhun ïa ki jingleh thok ha ki eksamin rung kam bad ïa kane ka aiñ rew la tip kum ka “The Public Examinations (Prevention of Unfair Means) Bill, 2024”.
Kiba bun na ki MP ki la ai jingmynjur ïa katei ka aiñ rew hadien ba ki la kyntait ïa ki katto katne ki jingpynkylla ba la wanrah da ki MP kiba shong ha ka liang pyrshah.
Ïa katei ka aiñ rew la wanrah ha ka Lah Sngi U Blei da u Myntri Khynnah ka Sorkar Pdeng, u Dr Jitendra Singh, bad ka thong jong ka, ka long ban ïada ïa ki samla wad kam.
Haduh mynta, kam pat don satia ka aiñ kaba dei ban teh lakam beit thik ïa ki jingleh thok ha ki eksamin rung kam.
U Dr Jitendra u la batai ba ka jingthmu jong katei ka aiñ rew ka long ban kham wanrah ïa ka jingshai, jingbym shah liang bad jingïaid beit ïaid ryntih ha ki eksamin pynrung kam, bad ban pynsngew ha ki samla ba lada ki trei shitom, kin ïoh ban kheit ïa u soh u bathiang bad ba kin ym don hapdeng ka jingsyier.
Katkum kane ka aiñ, ki kyndon jong ka kin treikam ha kaba ïadei bad ka jingpynrung kam ha ka Union Public Service Commission, Staff Selection Commission, Railway Recruitment Boards, Institute of Banking Personnel Selection, ki tnat treikam jong ka Sorkar Pdeng bad ki shnat jong ka, National Testing Agency, bad kiwei-kiwei katkum ka jingkdew jong ka Sorkar Pdeng na ka por sha ka por.
Ki kyndon ki batai ba kino-kino kiba shah rai pynrem kin ngat ha ka jingshah set patok kaba lah ban long hapdeng lai bad san snem namar ka jingpeit tuh/jingleh tuh katba ka jingpynsaja ïa kito kiba donkti ban pynïaid ïa ki jingleh be-aiñ ha ki eksamin kin ngat shong patok haduh 10 snem ha ryngkat ka kuna kaba T. 1 klur.
Nalorkata, katei ka aiñ rew kan ïakhun pyrshah ïa ki kynhun Mafia bad kiwei kiba donkti ha ki kam be-aiñ ha ka jingïakhun eksamin bad kan ym map ruh ïa ki nongtrei sorkar kiba ïatreilang bad kine ki ‘riew bymman.
Ha kajuh ka por, katei ka aiñ rew kan teh lakam ïa ki kynhun bad ki shlem kiba donkti ha ki kam leh thok tang ban ïoh pisa bad ka ïada ruh ïa kito kiba ïakhun ha ki eksamin.
U Dr Jitendra u la ong ba katei ka aiñ rew kan long kum ka nongmuna na ka bynta ki sorkar jylla ban pyntreikam katkum ka jingsngewbit ka jong ki. Hynrei u la ong ba ka aiñ kaba kum kane kan khanglad ïa ki runar ba kin pynthut ne pynjakhlia ïa ki eksamin pynrung kam ha ki jylla.
