Shillong, Rymphang 06
Ar ngut ki suba nongkhaïi drok lem bad uwei u khynnah rit ki la ngat ha kti jong ki pulit katba ki dang pyrshang ban khaïi drok ha jingkieng Lawmali.
Katkum ka khubor na ki pulit la ong ba ki pulit ka Anti Narcotics Task Force (ANTF) ha ka Sngi Ba-ar ki la ïoh kem ïa ar ngut ki briew bad uwei u khynnah uba dei u khun napdeng jong kitei ar ngut ha ka por kumba 11.30 eiei mynstep.
La ong ba kine ki suba nongkhaïi drok ha kane ka por, ki la don hapoh kawei ka kali Hyundai 120 rong ïong kaba don u number AS01-AT-0888. La ong ruh ba kitei ar ngut ki suba nongkhaïi drok kiba la shah kem, ki dei ruh kiba la don dak sniew ha ki kam thok kam shukor.
Na kine kiba la shah kem ki pulit ki la ïoh ban kurup ïa u drok heroin uba don ka jingkhia kaba 2.10 gram, 8 tylli ki dawai kuli Nitrazepam, 2 tylli ki spasmo proxyvon, 10 tylli ki thyrnia injek, 6 tylli ki mobile phone, kawei ka tari, ka pisa T.9710, kawei ka scooty ba don ïa u number ML05-R-8293 ba la lap najan kane ka jaka kaba dei jong uwei napdeng kiba shah kem, 10 tylli ki tin duma, 66 tylli ki bilor plastic rit ba bit heroin bad kawei ka mobile phone ba sniew.
Hadien kane, na ka liang jong ki pulit ki la pynnrung case pyrshah ïa kine ki briew hapoh ka kyndon jong ka NDPS Act.
