Shillong, Rymphang 06
Ka Sorkar India ha ka Sngi Ba-ar ka la pyntip ha ïingdorbar Lok Sabha ba ka Hynñiewtrep National Liberation Council (HNLC) ka dang dei kawei na ki seng kaba la shah ñiew be-aiñ katkum ki kyndon jong ka Unlawful Activities (Prevention) Act, 1967.
Haba jubab ïa ki jingkylli, u Myntri Khynnah ka tnat Korbar Ri, u Nityanand Rai, u la ong ba katkum ka jingpynkup bor da ka Sub-Section (1) jong ka Section 3 hapoh ka aiñ Unlawful Activities (Prevention) Act, 1967 (37 of 1967), ka Sorkar Pdeng ka lah ban kheiñ be-aiñ ïa kano-kano ka seng ne kynhun.
Kumba ka long mynta, ki kynhun/seng kiba la shah ñiew be-aiñ ki kynthup ïa ka Students Islamic Movement of India (SIMI), United Liberation Front of Assam (ULFA), National Democratic Front of Bodoland (NDFB), bad ki kynhun Meitei ha Manipur kiba long ka (i) Peoples’ Liberation Army (PLA) bad ka kynhun saiñpyrthei jong ka, Revolutionary People’s Front (RPF), (ii) United National Liberation Front (UNLF) bad ka kynhun kieng atiar jong ka, ka Manipur Peoples’ Army (MPA), (iii) Peoples’ Revolutionary Party of Kangleipak (PREPAK) bad ka kynhun kieng atiar jong ka, ‘Red ‘Army’, (iv) Kangleipak Communist Party (KCP) bad ka kynhun kieng atiar jong ka kaba la tip kum ka ‘Red Army’, (v) Kanglei Yaol Kanba Lup (KYKL), (vi) Coordination Committee (CorCom) bad ka (vii) Alliance for Socialist Unity Kangleipak (ASUK).
Nalorkata, ka don sa ka All Tripura Tiger Force (ATTF, National Liberation Front of Tripura (NLFT), Hynñiewtrep National Liberation Council (HNLC), Liberation Tigers of Tamil Eelam (LTTE), National Socialist Council of Nagaland (Khaplang) [NSCN (K)], Islamic Research Foundation (IRF), Jamaat-e-Islami (JeI), Jammu and Kashmir, Jammu and Kashmir Liberation Front (Mohd. Yasin Malik faction), Sikhs for Justice (SFJ), ka Popular Front of India (PFI) bad ki shnat jong ka kum ka Rehab India Foundation (RIF), Campus Front of India (CFI), All India Imams Council (AIIC), National Confederation of Human Rights Organization (NCHRO), National Women’s Front, Junior Front, Empower India Foundation bad ka Rehab Foundation, Kerala.
Ha kajuh ka por, la pyntip ba ka don ruh sa ka Jammu and Kashmir Democratic Freedom Party (JKDFP), Muslim League Jammu Kashmir (Masarat Alam faction)/ (MLJK-MA)bad ka Tehreek-e-Hurriyat, Jammu and Kashmir (TeH) kiba la shah kheiñ be-aiñ.
