Shillong, Rymphang 06
Kawei ka longkmie kaba shong ba sah ha kawei na ki dong ha Tura, West Garo Hills, ka la ujor ba uwei u nongpyndonkam ‘Facebook’ ïa uba la tip kyrteng kum u Subata Chakma, u la ïalong paralok bad ka ha ‘Facebook’ dang shen, hynrei khlem poi pyrkhat ka la shah thok shah shukor ha une briew kumba T. 69,655.
Ha kawei pat ka jingjia ha ka 2 tarik Rymphang ha ka por kumba 10 baje mynmiet, ki runar ki la shoh la dat ïa uwei u briew ïa uba la tip kyrteng kum u Sujit Kumar Sahani, 24 snem ka rta, ha Jhalupara, Shillong, bad namar ka jingmynsaw, la pynkit ïa u sha Shillong Civil Hospital ban ïoh ïa ka jingsumar.
Ka khubor na ki pulit ka ïathuh ba uwei u nongshong shnong ka Lumshatsngi, Laban, Shillong u la ujor ba ha ka 30 tarik Kyllalyngkot ha ka por kumba 7:20 janmiet, u la ïoh pdiang ïa kawei ka ‘phone call’ na uwei u briew uba la pynithuh ïalade ba u dei u paralok jong u uba la slem, bad uta uba la kam paralok u la kyrpad ïa u ba un ai pisa kylliang T. 25,000 da ka jingkular ba un pynphai biang. Uta u nongshong shnong ruh u la kohnguh bad u la ai ïa kata ka pisa. Hynrei hadien katto katne, u la sngewthuh ba u la shah shukor.
Sa ha kawei pat ka jingjia, u Deputy Director Printing & Stationery, Shillong u la ujor ba ha ka 26 tarik Nohprah, 2023, ha ka por kumba 4 baje janmiet, ki runar ki la prong sha ka shlem treikam jong u Director of Printing & Stationery, Shillong bad ki rah san song ki sainar (1.5 bad 2.5 mm).
Ha kawei pat ka jingjia, u Stibanson Buhphang u la ujor ba ha ka miet jong ka 1 tarik Rymphang, ki runar ki la tuh ïa ka thuk-thuk jong u (ML-05Y-4365) na Malki, Nongshiliang, Shillong.
Shuh shuh ha kawei pat ka khubor, u Precioustar Wanniang u la ujor ba ha ka 31 tarik Kyllalyngkot, ki runar ki la tuh ïa uwei u tiar ba la tip kum u Remote Radio Unit (RRU) uba shongdor T. 1.5 lak na ka jaka ba don u Tower ha Mawlanghen, Eastern West Khasi Hills.
Ha ka 3 tarik Rymphang ha ka por kumba 10:15 mynstep, ki pulit ki la pynlong ïa ka jingkhynra hajan thanat Dawki, West Jaiñtia Hills, bad ki la ïoh kem ïa ar ngut ki nong Bangladesh ba la tip kyrteng kum u Md Rasel Mia bad u Mizan Mia katba ki dang rung sha India khlem da don ki kot ki sla.
