Shillong, Rymphang 06
Hadien ba ki bahaïing bahasem jong u samla rangbah Marshal Mar-weiñ ki la lap noh ïa ka met jong u ha ka janmiet jong ka 6 tarik u Rymphang, 2024 kaba la ïaid sha ka 4 sngi hadien ka jingshah tep im ha ka synrum ñiut ha Marten, na ka liang ka Seng Samla Mawlai Pyllun ki la pynpaw ka jingsngewsynei bad ka jingïadon ryngkat lang khlem iehnoh ïa ka katei ka longïing kaba la shah kah ha u lyoh badum.
Haba ïoh ban ïakren bad u President ka Seng Samla Mawlai Pyllun, u Samuel Biam, u la ïathuh ba ka seng ka la ïoh jingtip halor kane ka jingjia naduh ka sngi ba u la jah, kata naduh ka sngi Saitjain ba la lah, bad namar ka jingbym don jong ki ha Shillong kumta ha ka sngi kaba bud ki la ïapoi lang ha katei ka jaka ban pynlong ïa ka jingwad ïa une u samla rangbah, u Marshal Marweiñ.
Ka Seng Samla Mawlai Pyllun lyngba u President ka la ai khublei bad pynpaw ïa ka jingsngewnguh sha baroh kiba la ïa don ryngkat lang bad kiba la trei shitom miet bad step ban wad ïa u Bah Marshal.
Nalor nangta ka la ai khublei ruh ïa ka tnat pulit kumjuh ruh ka tnat State Disaster Response Force (SDRF), ka tnat Shillong Municipal Board bad khamtam eh ïa kiba trei ha Marten kiba la shimkhia ban wad ïa ka met jong u Bah Marshal khlem shongthait.
Utei u President u la ong ba kum kane ka jingjia ka dei ka jingjia ha ka sien kaba nyngkong eh hapoh Marten bad ka la shimpor palat 72 kynta ban ïoh ïa ka met jong utei u samla rangbah.
Na ka liang u President ka seng u la pynpaw ruh ïa ka jingsngewkhia halor ka jinglong jingman ka jaka pyllang ñiut ha marten, ha kaba u la ong ba ka la donkam ban pynthymmai ïa katei ka jaka bad kum ka shnong Mawlai ka dang ïai angnud shisha ban pynkynriah noh ïa katei ka jaka bret ñiut sha kawei pat ka jaka.
”Ka jinglong jingman jong ka Marten ka long kumne bad ngi la ïohi shisha ba ka la donkam ban pynkynriah sha kawei ka jaka, kane ka jingïai pyrshah na ka por sha ka por ban pynkynriah ïa ka marten kan buh jingeh bha”, la ong utei u President.
Ha kajuh ka por, u la kyntu ruh ïa ki paidbah ba kin long kiba ïa sngewthuh jingmut lang bad ka sorkar, lada ka thmu ban wad jaka shane shatai ban rah noh ïa katei ka jaka bret ñiut.
