Shillong, Rymphang 06
Ki bahaïing-bahasem jong u Bah Marshal Marweiñ, 30 snem ka rta uba la shah tap im ha ka synrum ñiut ha ka 3 tarik u Rymphang ki la pynpaw ba kim kwah satia ban leh Post-Mortem ïa ka met jong utei samla rangbah.
Kum ban shu kdew hangne ïa ka met jong u Bah Marshal Marweiñ la lap na Marten ha ka 6 tarik u Rymphang ha ka por 4:30 janmiet hadien ka jingpynlong ïa ka jingwad naduh ka sngi ba u la jah bad shah tap im ha ka synrum ñiut.
Ïa ka met jong u Bah Marshal la lap hi da ki bahaïing bahasem jong u hapdeng ka jingingkhot namar ka jingkhluit bad ka jingbam jong ka ding na shapoh jong ka ñiut.
Na ka liang ki pulit ka thanat Mawlai ki la wan ban sei ïa ka met kaba dang sah jong utei samla rangbah.
Haba ïoh ban ïakren bad ka Kong Phelda Mary Lyngdoh Mawphlang kaba dei ka hep kynsi jong u Bah Marshal Marweiñ, ka la ong ba kum ka ïing ka sem hi kim kwah ban leh ïa ka Post-Mortem namar ki lah tip shai ba u Bah Marshal u la khlad na ka daw ka jingshah tap ha ka synrum ñiut bad ym dei ba u la khlad na kiwei pat ki daw.
“Ngim treh ban ai namar ngi la tip ba i khlad hangne bad ngin hun beit tang hangne bad ngin nym ai re”, la ong ka Kong Phelda.
Ka Kong Phelda ka la ïathuh ba na ka liang ka ïing ka sem ki la dep ban kren shai sha ki pulit ba kim kwah satia ban ai ïa Post-Mortem bad na ka liang ki pulit ruh ki la mynjur ban aiti noh ïa ka met jong u Bah Marshal sha ka ïing ka sem jong u khlem da leh ïa ka Post-Mortem.
“Ngim kwah shuh keiñ ban pynbunkam shu pynbunkam ïa ki paidbah, ki longheh bad kiba trei bad peit hangne, ngi kwah beit tang ban dep noh bad ngin buh haïing tang shimiet”, la ong ka Kong Phelda.
Ka Kong Phelda ka la ïathuh ruh ba ha ka sngi kaba bud kata ka 7 tarik u Rymphang 2024 kin pyndep noh ban leit tep ïa ka met jong u Bah Marshal ha u lum jingtep ka Balang Katholik Mawïong.
Ka Kong Phelda ka la ai khublei ruh ïa u Pastor Fastborn Suting na Lawbyrwa ba lyngba ka jingduwai jong utei u Pastor la lah ban ïoh noh ïa ka met jong u Bah Marshal.
“Lada ym dei ka jingduwai bad ka bor jong u Blei, nga tharai ngin nym lap namar katne ka tdem bad katne ka ñiut”, la ong ka Kong Phelda.
