Shillong, Rymphang 06
U Deputy Commissioner ka East Jaiñtia Hills, u A. Baranwal, IAS, u la pynmih da ka hukum ha kaba la mana ïa ka jingïaid kjat ne kali ne ki kali kit mar ha ki jaka ba hapoh 5 km na u khappud bad ka Bangladesh naduh ka por 6 baje janmiet haduh 5 baje mynstep manla ka sngi.
Ha kajuh ka por, la mana ruh ban khaïi be-aiñ ïa ki masi bad kiwei ki mar kum u kwai, ktung, biri, sikret bd kiwei sha Bangladesh. Kane ka hukum ban mana ka la mih ha ka 31 tarik Kyllalyngkot, 2024 bad ka la treikam mardor.
Nalorkata, la khang ïa ka jingïaid jong ki briew ha khappud da ka jingthmu ban rung tuh sha Bangladesh ne India.
Ka jingpynmih ïa katei ka hukum da u Deputy Commissioner haba pynjari da ka kyndon 144 CrPC, ka long hadien ba ki BSF ki la ai jingtip ba ka bynta kaba hap ha AOR jong ka 172 Battalion, ka long ka jaka kaba ka jingkhaïi be-aiñ ïa ki mar ki mata naduh ki masi, kwai, ktung bad kiwei ka jur bha.
Ha kajuh ka por, la ong ba ki BSF ki la ïoh jingtip ba ki nongkhaïi mar be-aiñ bad ki runar ki ju ïalum da kiba bun ngut hajan khappud ha ka por mynmiet ban khaïi tuh ïa ki mar na India sha Bangladesh bad na Bangladesh sha India.
Nalorkata, la ong ba ki dkhot jong ki kynhun lehnoh bad ki Rohingya ki lah ban rung tuh sha India ha ka por mynmiet bad kane ka lah ban ktah jur ïa ka shongsuk shongsaiñ bad ka jingshngaiñ jong ka jylla bad ka Ri.
Shuh shuh u Deputy Commissioner u la pynkynmaw ba dang shen, ka la don ka jingshah pynïap ba shyrkhei jong uwei u nongshong shnong ka Umkiang ha ki nong Bangladesh kiba la rung tuh sha India.
