Nongpoh, Rymphang:
Ka Balang Shnong Katholik ha Sohphoh ne ka Madan Khah, hapoh Ri Bhoi, ka la kynjoh 100 snem kynthih. La rakhe ïa kane ka lyngkhuh ba 100 ha ka 4 tarik u Rymphang, 2024 ha shnong hi da ka jingiphuh jingiphieng ha kaba kumba 5000 ngut ki riewngeit kylleng ki jaka ki la poi.
La seng Balang ha Sohphoh ha shuwa ka 1923 lyngba ka kmie u Shangweng Madur, ka Pheri Madur bad ka Shiri Madur, ka Prinsiska, ka Syndong Be, ka Synjai Be, ka Long Be, u King Wahphlang, u Niangdum Shadap, u Paulus Be bad ka Kwintina Shadap. La pynlong jingïaseng manla ka Sngi U Blei ha Madan Khah (Sohphoh) ha ka snem 1923 ha kaba la jied Nongïalam Balang (Rangbah Balang) ïa u Shangweng Madur. Ha ka 24.4.1930 la pynlong ïa ka jingïaseng bah ha shnong bad la plie pynskhem ïa ka Balang da u Mishoneri baradbah tam jong ka Ri Khasi, u Phadar Constantine Vendrame, SDB mynba u la long slem kum u Phadar Rangbah jong ka Parish Laitumkhrah.
La kyrkhu ïa kane ka shnong bad ka thaiñ Ri Bhoi baroh kawei da uba shalyndet da kaba ïoh ïa ka Parish Thymmai ha Mawlai ha ka snem 1939 bad mar ïabud ryngkhi la ïoh ïa u Nonghikai bad Nongïalam ne Katekist uba tbit bad paw bha, uba kyrteng u Mathias Pilat na ka shnong Umtngam uba tong ïa bun bah ki mynsiem jong ka Ri Bhoi Ri Them sha U Blei. Dei ha ka snem 1940 ba ka Sohphoh (Madan Khah) ka la ïoh ïa ka jingïaseng bah ha kaba bun bah ki briew ki la wan na kylleng ka Ri Bhoi khamtam na Mawlasnai-Khyndawso, Tyrso, Umtngam, Mawshrieh, Mawkaleng, Mawïong bad Umtyrkhang bad la shim por slem na ka bynta u Phadar Carmelo, SDB, ban pynbaptis ïa ki briew ban rung ha ka Balang.
Ka Sohphoh bad bun ki Balang shnong ha Ri Bhoi bad wat katto katne na Ri Lyngngam bad Muliang ruh ki la hap noh ha Parish Nongpoh ha ka snem 1952. Katkum ka jingtip ba la ïoh na ki riewrangbah ka Balang Sohphoh jong ka Balang ha Madan Khah ka la ïoh noh ïa ka Kyrteng Sohphoh dei na u Rev.(Dr) Silvanus Sngi Lyngdoh. Kane ka Balang shnong ka la hap noh hapoh Parish Umsohlait mynta dei ha ka snem 1972. Kane ka Balang Sohphoh kam shakri ïa ka shnong tang ha ki kam mynsiem hynrei ha ki ba bun ki jingdonkam jong ka met ruh khamtam lyngba ban ai jingnang jingstad da ka ba seng skul lyngba ka matti jong u Phadar Michael Balawan SDB ha ka por ba u la long phadar Rangbah ha Nongpoh Parish.
Ïa kane ka Balang ha Sohphoh la aiti Kyntang nyngkong ha ka jingïada jong u Petrus bakhuid. Hadien kata ha u Paulus bakhuid bad hadien ba la wan shimti ïa ka kam Balang (Mission) ha Sohphoh da ka kynhun riewniam Mishoneri St. Francis D’Assisi la aiti kyntang noh ha ka jingïada ïa ka Balang shnong Sohphoh ha u St.Francis D’Assisi.
Ka shnong ka don 140 tnum ïing baroh bad kumba 1000 ngut eiei ki khlieh briew. Tang ki Katholik ki don 709 ngut.
