Shillong, Rymphang 06
Ka Coordination Committee kaba kynthup ïa ka MeECL, ka PWD, Transport bad ki bor pynïaid district ka East Khasi Hills and Ri Bhoi bad ka tnat pulit kin sa ïakynduh lang ban pynbeit ïa ka sngi lano yn khang ïa ka jingkieng Umïam namar ka jingbujli thymmai ïa ki ‘bearing’ kiba don ha kane ka jingkieng.
U Myntri ka tnat bording u AT Mondal u la ong ba shen yn sa pynbeit ïa ka sngi na ka bynta ban rah ïa ka jingkieng shalor ban bujli ïa ki ‘bearing’ khnang ban pynbna ïa ka sngi ban khang shisyndon ïa ki kali ban ïaid lyngba kane ka jingkieng.
U Mondal u la ong ba ha ka sngi ban leh ïa kane ka kam, yn sa pynbna paidbah ban khang ïa ka jingkieng Umïam khamtam ha ka por ban rah ïa ka jingkieng shalor bad ha ka por ba pynhiar biang shapoh ïa ka jingkieng ynda la dep ban thep ïa ki bearing kiba thymmai.
Hadien ba la rah ïa ka jingkieng shalor, yn dang lah ban shah ïa ki kali rit ban ïaid da kaba buh ïa ka ‘ramp’ bad ym dei ban palat ïa ka 4 metric ton ha kaba ki kali barit khamtam ki Ambulance ki lah ban ïaid.
Ha kajuh ka por u Mondal u la pyntip ba ka jingmaramot ïa ka bynta ba den ïa ka pung Umïam kaba la ïaid shakhmat kan dep hapdeng 3 ne 4 bnai.
Kumta u la kyntu ïa ki kali kiba dei ban ïaid lyngba ka jingkieng Umïam ban ïaid lyngba kiwei pat ki surok kiba la pynbeit ban ïaid ki kali la ka dei kiba wan kiew sha Shillong bad kiba hiar na Shillong.
