Shillong, Rymphang 07
Ka Sorkar Jylla kan sa wanrah ha Ïingdorbar Thawaiñ ïa ka mang tyngka ka Jylla na ka bynta u snem 2024-2025 ha ka Dorbar Mang Tyngka ka ban sa wan ha 21 tarik mynta u bnai.
Ka Dorbar Mang Tyngka kan sdang ha ka 16 tarik jong u Rymphang.
U Myntri Rangbah u Conrad K Sangma uba peit ïa ka tnat pla tyngka, un sa wanrah ïa ka mang tyngka bad ai jingkren hapoh Ïingdorbar Thawaiñ ha katei ka sngi.
Ha kane ka Dorbar Mang Tyngka, kan dei ruh ka sien banyngkong ha kaba u Myntri Rangbah un wanrah ïa ka mang tyngka bad ai jingkren halor ka mang tyngka hapoh Ïingdorbar Thawaiñ khlem da pyndonkam shuh ban shon ha ka kot, hynrei ka mang tyngka bad ki jingkren kin long katkum ki kor ki bor khlem da pyndonkam kot shuh (paperless).
Ïa ka jingkren halor ka Mang Tyngka lah ban ïoh lyngba ka National eVidhan Application website: https://neva.gov.in/Home/NeVA bad lyngba ka website jong ka Meghalaya Legislative Assembly website: https://megassembly.gov.in/.
Baroh ki dkhot ka Ïingdorbar Thawaiñ kin sa ïohi ïa ka jingkren halor ka mang tyngka da kaba plie ïa ka mobile tablet kaba la dep ai ïa ki MLA ban pyndonkam hapoh ka Ïingdorbar Thawaiñ.
Kumba ju long ka rukom pynïaid Dorbar, ka Dorbar Mang Tyngka kan sdang ha ka 16 tarik u Rymphang da ka jingkren jong u Lat. Ka Dorbar kan kut ha ka 27 tarik u Rymphang.
