Jowai, Rymphang:
Ka Society for Urban and Rural Empowerment (SURE) ha ka 6 tarik Rymphang ka la pynlong ïa ka jinghikai ban shna synsar ba 15 sngi na ka bynta ki 10 ngut ki briew ki bym lah ïohi ha Dorbar Hall jong ka dong Lumbhahdakha, Wahïajer.
Ïa kane ka jinghikai la bei pisa da ka tnat District Social Welfare, Jowai bad ïa ka jinghikai la hikai da u Bah Kelvin Suting uba dei u State Award Winning Master Craftman uba ïalade ruh u dei u bym lah ban ïohi.
Ïa kane ka jinghikai la plie da u Bah FB Basan MCS, ADC uba long ruh u Project Director District Rural Development Agency (DRDA) ha ka jingdonlang ki riew rangbah ka Lumbhahdakha.
U Bah Basan ha ka jingkren u la kyntu ïa ki nongïoh jinghikai ba kin shimkhia ïa ka jinghikai bad ban trei ïa ka kam kaba ki la ïoh jinghikai.
Ka Kong Niwanka Shylla, Project Coordinator SURE kala batai shaphang ka seng bad hadien pat la ïoh ïa ka jingkren na ka Kong Ilasiewdor Gashanga kaba la batai shaphang ki Skill Training kiba la leh da ka SURE kaba long ka Training Provider jong ka Meghalaya State Skilll Development Society (MSSDS).
U Bah Heipor Laloo, Supervisor District Social Welfare Department u la ïathuh ba ka ophis jong ki, ka peit ïa ki briew kiba don ha ka jingduna bad na ka liang ka ophis ka sngewkmen ba ka SURE ka lah ban pyntreikam ïa kane ka jingai jinghikai.
Ha kane ka sngi la ïoh ruh ïa ka jingkren na u Chairman ka Dong Lumbhahdakha Bah Salonmiki Dhar, Bah Lambor Suchen District Skill Officer u la kren shaphang ki skill training kiba la pyntrekam ha ka District.
