Shillong, Rymphang 07
U Myntri Rangbah ka Jylla, u Conrad K. Sangma, ha ka Sngi Balang u la ïashim bynta ha ka prokram jong ki Self Help Group hapoh ka Pradhan Mantri Krishi Sinchayee Yojana, (PMKSY-WDC 2.0) bad sam ruh ïa ki ‘cheque’ ba mar T.50,000 sha ki SHG kiba na ki distrik bapher-bapher ka Jylla.
Haba ai jingkren ha ka jingïalang, u Sangma u la ong ba ka um ka long ka jingdon-jingem kaba donkam na bynta kano-kano ka ri bad ka jingïoh ban pdiang ïa ka um bam kaba khuid ba shngaiñ kan long ka jingtynjuh na bynta kiba bun ki ri.
“Baroh ki stadwad jingtip ki kdew ba kan don ka khim khait kaba khraw ha ka liang ka um,” u la bynrap.
U la ong ruh ba la kyrkhu ïa ka Jylla da ki tyllong um kiba bit ka biang hynrei ka jingeh ka dei bad ka jingkhmih ban pynbeit ïa ka um.
“Ha kine ki snem ba la leit, ngim shym la lah ban pynbeit bha ïa ki tyllong um jong ngi ha ka rukom kaba paka tam,” u la ong.
“Kaei kaba ngi leh mynta ka sngi ka long ka sienjam kaba khraw ka ban pyntikna ba ka um jong ngi bad ki tyllong um ki long kiba manbha,” u la bynrap.
U Myntri Rangbah u la ong ruh ba bun bah ki briew ki shaniah ha ki khlaw, jaka bad ki tyllong um na bynta ka lad kamai.
“Ngi hap ban ting ïa ki sienjam kiba 2 lynti ha kaba yn lah ban khmih bniah ïa ki jingdon-jingem, ha kajuh ka por ki briew kin ïoh kawei pat ka lad kamai na bynta ka jingmih kaba seisoh bad ka ban neh,” u la ong.
U la ong ruh ban pyntreikam hok ïa kine ki ar tylli ki lynti, ka jingïadon bynta lang jong ka imlang-sahlang ka dei kaba biang tam ban ïaid shakhmat.
Hashuwa, u Myntri ka tnad Soil & Water Conservation, u Marcuise N. Marak u la ong ba ka PMKSY ka la leh ïa ka bynta ba kongsan ha ka ban ai lad ïa ki SHG ban pyntreikam ïa ki kam pynmih jingïohnong bapher-bapher, ban kynthup ïa ka lynti katkum ka juk stad ba mynta ha ka rep ka riang kumjuh ban pynkhlaiñ ïa ki lad kamai ha ki kam ki jam bad ka Watershed Development Component jong ka PMKSY ym tang ba ka la pynleit jingmut ban kyntiew ïa ka lad kamai, hynrei ka la pynbha ïa ki rukom treikam jong ki nongrep hapoh ka Jylla.
U la ong ruh ba lyngba ka jingpynwanlang ïa ki skhim bad prokram bapher-bapher ha ki tnad treikam kum ka rep ka riang, kam pynroi ha ki jaka nongkyndong, Forestry bad Water Resource Management, ka PMKSY ka la kynjoh ïa ka roi ka par kaba neh bad kaba kynthup pura.
Shuh shuh u Myntri u la bynrap ba ka Watershed Development Component jong ka PMKSY ka la synñiang sha ka jingmanbha jong ka tnad ka rep ka riang, pynkupbor ïa ki imlang-sahlang bad wanrah ruh ïa ki lad ki lynti ha ka kamai-kajih.
Kiba bun ki SHG na Ri-lum Khasi, Jaiñtia bad Garo ki la pynsngew ruh ïa ki jingshem jong ki ha kane ka sngi.
