Shillong, Rymphang 07
U Myntri Rangbah ka Jylla u Conrad K Sangma ha ka Sngi Balang u la pyntip ba ka Sorkar India ka la bthah ïa ka Sorkar Jylla ba kan bishar thymmai biang ïa ka jingtyrwa ha ka ban pynkhuid ne pynwandur biang sa shisien ïa ka Wah Umkhrah bad Umshyrpi.
Ka Wah Umkhrah bad Umshyrpi ki la dei ki ar tylli ki wah kiba itynnad bad khuid ha ki por kiba la leit hynrei mynta kine ki wah ki la kylla long pynban ka jingpynjah burom ïa ka nongbah Shillong.
U Conrad u la ong ba ha ka jingshisha, na ka liang ka sorkar ha ki por ba la leit ka la dep ban buh ïa ka jingtyrwa ban pynkhuid ïa ka Wahumkhrah bad Umshyrpi hynrei na ka liang ka Sorkar India kam shym la mynjur satia ïa ka jingmang pisa ïa ka projek ha katei ka por.
“Ka Sorkar India ka la bthah ïa ngi ban bishar thymmai biang, ïa kaba mynta ki dang leh,” la ong u Conrad haba ai jingkren hadien ba la dep ban buh mawnongrim ïa ka Wah Umkhrah Riverfront Development Project kaba T.39 klur bad u la bynrap “Nga kyrmen skhem ba katba kane ka projek ka dang ïaid ngi ruh ngin nang pynkhreh ïa ka projek ka ban kynthup ïa ka jingpynkhuid ïa ka Wah Umkhrah bad Umshyrpi, kaba la donkam palat.”
Ha kaba ïadei bad ka river front project, u Conrad u la ong ba kala don ka jingmang pisa kaba T.39 klur na ka bynta kane ka projek bad bynrap ba ka Sorkar kan sa pyllait noh ïa ki tender tang ha kine ki khyndiat taiew.
U Myntri Rangbah u la pyntip ba ka jingthmu jong kane ka projek ka long ban wanrah ïa ka jingkylla dur bad jingpynitynnad ïa ka nongbah Shillong. Nalor kane, kan sa don ruh shibun ki kam kiba yn sa leh ha kine ki khyndiat bnai ban wan bad kane ka prokram hi kan dei kaba ïai bteng.
U la ong ba kin sa don ka jingkren ba kan nym don jingmut ban pynitynnad ïa ki rud wad, katba yn nym lah ban pynkhuid pat ïa ka wah, hynrei u la kren shai ba ka sorkar kam shym la leh klet ïa kane, bad ka sngewthuh ba ka water front development bad ba ka jingkhuid ka um ruh ka donkam, hynrei donkam pat nyngkong ban ïoh ka jingsdang namar khlem sdang kumno yn lah ban poi sha ka thong.
Haba pynpaw ba kane ka projek kan ym don jingmut khlem ka wah, u Myntri Rangbah u la pan ïa ka jingkyrshan, ka jingïatreilang bad ka jingïashimbynta lang jong ki shnong ki thaw.
Nalor kane ka projek kaba kongsan, u Myntri Rangbah u la ong ban wanrah ïa ka jingkhuid jingsuba jong ka wah, ka sorkar kan sa shim rai ban pynbna ban buh noh shisngi ha manla ka lai bnai, ban pynlong ïa ka jingpynkhuid shnong ha ki shnong bapher bapher.
“Ngin sa pynlong ïa ki jingpynkhuid shnong ha la ki jong ki shnong ha kaba ka Sorkar Meghalaya bad ka tnat Pynroi Sor kin bei pisa sha kine ki shnong, lada donkam, kan ai ruh ïa ka jingïarap song pisa ba kin pynlong ïa kine ki jingpynkhuid shnong,” u la ong.
U Myntri Rangbah u la bthah ïa ka Deputy Commissioner ban pynbeit ïa ka tarik halor ban pynlong ïa ka jingpynkhuid shnong tang mar sien kut ka Dorbar Mang tyngka.
