Nongstoiñ, Rymphang 07
Ki paidbah nongshong shnong jong ka Tiehsaw, Nongstoiñ da ka mynsiem kaba sngewkhia bad kthang jur, ha ka Sngi Balang ki la ïa mih paidbah naduh ki khynnah, ki samla bad ki longkmie longkpa ban ïa shim bynta ha ka jingïaid paidbah ba la pynïaid da ka Dorbar Shnong Tiehsaw na ka bynta ban pynrem jur ïa ka jingshah pynïap dusmon jong ka longkmie armet kaba la jia hapoh ka shnong Tiehsaw ha ka 2 tarik u Rymphang.
Ha kane ka sngi la sdang ïa ka jingïaid paidbah da ka jingïalang kaba lyngkot hapoh ka madan shnong Tiehsaw ha kaba la sakhi da ka jingïadon ryngkat lang u MLA ka thaiñ u Bah Gabriel Wahlang, ki nongïalam shnong, ki seng bapher bapher bad ki paidbah kiba la pynlong ruh ïa ka jingsngap jar ba shi minit kum ka dak ban sngewlem ïa ki bahaïing jong ka longkmie ba la khlad noh.
Ka jingïaid paidbah ka la sdang ter ter na ka shnong Tiehsaw sha sor Nongstoiñ ha ryngkat ki lama ïong bad ki jingthoh pynrem ha ki placard bad ruh ki sur ba jam kiba la mih ban ai jingbishar hok ïa ka Kong Wansaralin Wanniang bad ruh ban set along shi jingim ïa u nongpynïap briew. La pynkut ïa kane jingïaid paidbah hakhmat ka phyllaw jong ka shlem treikam u DC ka WKHD.
Ki ‘riew rangbah jong ka shnong Tiehsaw, Nongstoiñ haba kren ha katei ka jingïalang ba lyngkot ki la ong, “Ngi ka shnong ngim kwah ban long ki nongpynïap briew bad ngim kwah ba ka shnong Tiehsaw kan bit snam, ngi im ha kajuk jong ka aiñ, ngi im ha ka kajuk jong ka jingshai ngim im ha ka juk jong ki ‘riewkhlaw, ki mrad ki mreng bad ki ksuid kynsha ban leh katba mon.”
Shuh shuh kiwei ‘riew rangbah ki la pynpynpaw ruh ba ka shnong halor katei ka jingjia ka la dep ban phah ïa ka jingthoh sha ki bor sorkar ban ong ba kum ka shnong ka pynrem jur ïa ka jingleh jong utei u ‘riew runar uba la leh beiñ bad leh sat, ha kaba ka kam ka jong u, ka la long ka kam mrad ha kaba kat ïa la ka lok bad i khyllung kiba hok kiba lui-lui um shym la kheiñ snep.
Ki la ong ruh ba ka shnong ka la rai ruh ba kan ïai buddien ïa katei ka kam ba ki bor sorkar ki dei ban leh tyngeh ba une u runar u dei ban ïoh ïa ka hok jong ka jingshah pynshitom katkum ka jingleh ka jong u.
