Shillong, Rymphang 07
Ha kawei ka jingjia ba la pyntip sha ki pulit, la ong ba uwei u nongshong shnong ka nongbah Shillong u la shah thok pisa katba u dang wad kam lyngba ka ‘Telegram’.
Ha ka khubor ba la paw ha ka Sngi Balang, la ong ba hapdeng ka 28 tarik Kyllalyngkot bad 1 tarik Rymphang, utei u nongshong shnong u la shah shukor haduh T. 16,70,232 katba u dang wad kam da kaba pyndonkam ïa ka ‘Telegram’.
Ha kawei pat ka jingjia ha ka 5 tarik Rymphang, ki runar ki la leit prong ha ka FGM Dhaba ha Tharia hajan ka jingkieng Wah Rew bad ki la tuh ïa ka pisa kaba don kumba T. 25,000/-, kawei ka EPIC, Aadhaar bad kiwei.
Shuh shuh la ong ba ha kawei ka jingjia, u Ricky Ladawnpuia u la ujor ba ha ka 4 tarik Rymphang ha ka por kumba 10 baje mynmiet, ki runar ki la tuh ïa ka thuk-thuk jong u para jong u kaba don ïa u nombor (MZ-01R-5938) na Lower Lachumiere, Block-IV, Shillong.
Nalorkata, ha kawei pat ka jingjia, u Wilson Tariang, Security ka Goldstone Cement Ltd., Musiang Lamare Old, East Jaiñtia Hills, u la ujor ba ha ka 2 tarik Rymphang ha ka por kumba 1 baje shiteng synñia, ki runar ki la plie ïa ka tala jong ka E&I Workshop bad ki la tuh ïa kawei ka Welding Machine, sainar bad kiwei ki mar ki mata kiba shongdor kumba T. 69,930/-.
Ha kawei pat ka jingjia, u Apdamehi Sutnga u la ujor ba ha ka 2 tarik Rymphang ha ka por kumba 9 baje mynmiet, ki runar ki la tuh ïa ka pisa kaba don T. 1,05,000/- bad kawei ka Mobile Phone na ka trok jong u (NL-01AF-4481) kaba la pynïeng ha Malidor, East Jaiñtia Hills.
La ïoh jingtip ruh ba u Badarson Lapang u la ujor ba ha ka 25 tarik Kyllalyngkot ha ka por kumba 3 baje shiteng synñia, uwei u khynnah ba dang 18 snem ka rta u la prong sha ka ïing sah jong u ha Raitong, Ri-Bhoi bad u la tuh ïa ka pisa kaba don kumba T. 1.6 lak..
Nalorkata, ha kawei pat ka jingjia, u Walbath T Sangma u la ujor da ka ktien ba ha ka 1 tarik Rymphang, ka thuk-thuk jong u (AS-18K-0953) ka la jah na Jengjal Bazar, West Garo Hills, hynrei ha ka sngi kaba bud, ïa kane ka thuk-thuk la ïoh na ka thaiñ Rongram.
