Dehradun, Rymphang 07 (UNI)
Ka Ïingdorbar Thawaiñ ka jylla Uttarakhand ha ka Sngi Balang ka la ai jingmynjur ïa ka aiñ rew ban pyntreikam ïa ka Uniform Civil Code (UCC) bad ki kyndon jong ka kin dei halor ki kam shongkha shongman, jingpyllait san shyieng bad jingïoh pateng jong baroh ki jait niam/jingngeit kiba don ha kane ka jylla.
Ka Uttarakhand ka dei ruh ka jylla banyngkong tam ha India kaba la ai jingmynjur ïa kaba kum katei ka aiñ ban pyntreikam ïa ka UCC.
Haba ai jingkren ha Ïingdorbar Thawaiñ halor katei ka aiñ rew, u Myntri Rangbah, u Pushkar Singh Dhami, u la ong ba ïa ka UCC la wanrah katkum ki kyndon jong ka Riti Synshar. Katei ka aiñ rew kan long aiñ bapura ynda la ïoh ïa ka jingmynjur na u Lat.
“Hadien ba la ïoh ïa ka jinglaitluid, ki nongthaw ïa ka Riti Synshar ki la aibor ïa ki jylla ïa ka hok ban pyntreikam ïa ka UCC ha ka por kaba ki sngewbit…Ki briew ki dang don ki jingartatien halor kane. Hynrei ngi la shna ïa kane ka aiñ katkum ki kyndon jong ka Riti Synshar,” la ong u Myntri Rangbah.
Katkum katei ka aiñ, la ai jingmut ba ki kyndon kin dei kumjuh na ka bynta ka kam shongkha shongman, jingpyllait san shyieng bad jingïoh pateng na ka bynta baroh ki jait niam/jingngeit kiba don ha Uttarakhand.
Sa kawei pat ka kyndon bakongsan ka long ba kito ki shijur kiba la ïashong ïasah lang, watla ki khlem pat pyndep ïa ka jingïathoh shongkurim, kin hap ban ai kyrteng. La ong ruh ba na ka bynta ban ïashong ïasah lang kumne, ki shijur kin hap ban ïoh shwa ïa ka jingai jingbit na ki kmie ki kpa. Kane ka rukom ïashong ïasah lang khlem pat da ïathoh shongkurim ka dei kaba ki khot ka ‘live-in relationship’ hapdeng ki shijur kiba la biang ka rta katkum ka aiñ.
Nalorkata, katei ka aiñ rew ka la khang pyrshah ïa ka jingïathoh shongkurim bad ki nongshong shnong kiba dang khynnah bad ka wanrah ruh ïa ki kyndon kiba long kumjuh na ka bynta baroh ha kaba ïadei bad ka jingpyllait san shyieng.
Ha kajuh ka por, katei ka aiñ rew ka ai ïa kijuh ki hok sha ki kynthei kiba dei na ki niam/jingngeit bapher-bapher ha kaba ïadei bad ka jingïoh bynta ïa ka nongtymmen.
