Shillong, Rymphang 07
Ka Voice of the People Party (VPP) ka la ong ba ka jingmynjur ban buh ïa u dubasia ha ka sngi ba ai jingkren u Lat ka Jylla, u Phagu Chauhan hapoh ïingdorbar thawaiñ ka dei ka jingpynskhem ïa ka nongrim bad jingdawa jong ka seng.
Ka seng ha ka kyrwoh ka la ai ïa ka jingïaroh ïa u Lamphang ka ïingdorbar thawaiñ ka Jylla bad ïa ka Sorkar MDA-II naba khatduh khatwai ki la sngewthuh ba ka Meghalaya kam dei ka Jylla kaba kren ‘Hindi’.
“Ka jingmynjur jong ki ban buh ïa u dubasia (Translator) ha ïingdorbar thawaiñ ha ka sngi ba u Lat un kren, ka dei ka jingpynskhem ïa ka nongrim bad jingdawa jong ka VPP,” la ong u nongaiktien ka seng, Dr. Batskhem Myrboh ha ka kyrwoh.
Lah ban pynkynmaw ba ha ka sienshong Dorbar Mang Tyngka ha u snem 2023, u Lamp-hang bad ka Sorkar Jylla ki la shu da rapjot bad pynbor ïa ki paidbah jong ka Jylla ban sngap ïa ka jingkren u Lat ha ka ktien kaba kim sngewthuh bad ka bym dei ruh ka ktien ba la ithuh (official language) jong ka Jylla.
Ka VPP ka ai khublei ïa ka jingshlur bad ka nongrim baskhem jong ki MLA ka seng halor kane ka kam bad ka ai ïa ka jingkyrkhu kyrdoh ïa ki ha ka jingpyrshang jong ki ban shakri ym tang ïa ki paidbah jong ki konstitwensi jong ki hynrei ruh ïa ka Jylla baroh kawei kynthup ïa ki konstitwensi jong kito kiba don ha ka liang synshar.
Kum ban shu kdew hangne, ka VPP ka la kren shai ba ka seng kan ym ïadon bynta ha ka Dorbar Mang Tyngka ka ban wan lada u Lat ka Jylla, u Phagu Chauhan um kren da ka ktien Phareng ne lada ka Assembly Secretariat kam lah ban pynbiang ïa u nongpynkylla ktien ha ka por ba kren u Lat.
