Shillong, Rymphang 07
Ïa ka met kaba dang sah jong u Bah Marshall Marweiñ la pyndep noh ïa ka jinglehñiam ha ka Sngi Balang ka 7 tarik u Rymphang 2024 ha u Lum Jingtep ka Balang Katholik ha Mawïong.
Hashwa ban rah ïa ka met sha u lum jingtep, la pynlong shwa ïa ka jingïaseng ha ïingsah jong u Bah Marshall ha Mawïong Mecofed ha ryngkat lang ka jingwan pyntngen ki paralok parajor, ki paramarjan, ki para ba ïatreilang bad ki bahaïing-bahasem ha ryngkat ka shnong ka thaw.
Kum ban shu pynkynmaw u Bah Marshall Marweiñ u la shah ban ha ka synrum ñiut kaba rben ha Marten naduh ka 3 tarik u Rymphang 2024 katba u dang tam mar jot na katei ka jaka. Hadien ba pynlong ïa ka jingwad la lap ïa ka met jong u kaba la ïng bad pra na ka jingbamduh jong ka ding.
U Bah Marshall u dei u nongbud jong ki trok lum ñiut jong ka Shillong Municipal Board (SMB) bad uba imsngi ruh da kaba tam tinjot ha Marten.
Une u rangbah u la iehnoh shadien ïa ka lok bad arngut ki khun kiba dangrit.
Na ka liang u Bah Respar Marweiñ uba dei u kñi jong u Bah Marshall Marweiñ haba ai jingkren ha ka jingïaseng hashwa ban leit rah on tep ïa ka met ba dang sah jong u Bah Marshal Marweiñ, u la ong ba kum ka ïing ka sem ka dum ki buit ki stad ha ka ban wad ïa u Bah Marshall namar ka la don kumba saw sngi ka jingïa wad hynrei kim pat lap dien eiei.
U la ong ruh ba kum ka ïing ka sem kim shym la kyrmen shuh ba kin dang lah ban ïohi ne lap ïa ka met jong u Bah Marshall hynrei wat la katta ruh ki dang ïoh ïa ka met.
“Ngi ruh kum ki bahaïing-bahasem ngim don shuh kano-kano ka jingkyrmen ba ngin dang ïoh ïa ka met, ngi la dumbuit bad ngi la lyngngoh ngaiñ da ki 3-4 sngi hynrei wat la katta ruh ngi dang ïoh,” la ong u Bah Respar.
U la ai khublei ïa ka tnat Municipal baroh naduh ki nongtrei kiba la trei shitom miet la bad sngi ban wad ïa u Bah Marshall bad ruh ïa ki paidbah kiba la buh ha ki jingduwai, ïa ka shnong Mawïong bad ïa baroh kiba la wan ban pyntngen bad ai mynsiem ïa ki kum ka ïing ka sem.
U Bah Respar u la ïathuh ba u Bah Marshall u long u briew uba don ïa ka mynsiem kaba shida haduh katta-katta bad u dei u briew u bym ju kwah ban pynsngewsih ïano-ïano ruh hynrei u dap da ka jingkmen bad ka jingphuh samrkhie.
Shuh shuh u Bah Respar u la ïathuh ba um ju don kano-kano ka dak sniew hapoh shnong hapoh thaw naduh ba u dang khynnah haduh ba un da long samla rangbah.
