Shillong, Rymphang 07
Wat lada u dei tang u misteri uba bunkam ban shna ïing jong ki briew, hynrei ka sap jong u Bah Eibanroi Langstieh 33 snem ka rta kam shym la kut tang ha ki saw kynroh haba u ju rwai shwa ban thiah hadien ba u la wan na ki kam ki jam. Mynta une u samla u la paw pyrthei ïa ka sap rwai naduh ba u la pynmih nyngkong ïa ka music video kaba ai kyrteng ‘Ngan Jied Nyngkong’ ha YouTube.
U Bah Eibanroi Langstieh u dei uba shong ba sah ha Ladmawreng ka lynti na Upper Shillong sha Mawngap, East Khasi Hills District. U don hynriew ngut shipara katba ka kmie ka la khlad la slem bad mynta u sahlang bad ki para lem bad u kpa.
Ka jingrwai kaba la rwai nyngkong da u Bah Eibanroi ka dei kaba kyrteng “Ngan Kham Jied Nyngkong” kaba la ak da u Bah Keebor Kurbah bad ka Sherilin Khongwar ba la ringdur da u Bah Elvest Thabah, nangta ka jingrwai kaba ar ka dei “Ngan Ym Shet Kylla” bad kaba lai ka dei ‘Da Jingkmen’ kaba dei ka jingrwai shad kaba la ak da u Bah Keebor Kurbah bad ka Medaaihun Basaïawmoit ba la ringdur da u Bah Elvest Thabah kiba la poi palat million ki nongpeit ha youtube channel u Bbah Eibanroi Langstieh.
Ban tip ïa ka jingïaid lynti ha kane ka sap rwai, U Nongsaiñ Hima u la leit ïakynduh kyrpang ïa u Bah Eibanroi ha ïingsah jong u ha Ladmawreng.
Ha ka jingïakren bad u Bah Eibanroi, u la ïathuh ba u ju rwai haba don prokram ha ïingmane bad u ïoh ruh ka jinghikai na u kpa uba la ju ïarwai ban pynmih kaset bad u Bah Skendrowell Syiemlieh ha ki por mynshwa.
U la ïathuh ba man ka sngi u ju im ban leit bylla shna ïing jong ki briew bad mynmiet shwa ba un thiah u ju tem ka kaitar ban rwai.
“Ngam poi pyrkhat ba ki paidbah kin sngewtynnad ïa ka jingrwai jong nga haba nga shu pyrshang ban rwai bad kane baroh ka dei ruh ka jingïarap lang u Bah Elvest Thabah, ka Sherilin bad u Bah Keebor Thabah kaba nga la ïoh ban pyllait nyngkong ïa kato ka music video “Ngan Kham Jied Nyngkong” u la ong.
U la ïathuh ba ha kane ka jingrwai ba ar kaba u la ai kyrteng ‘Da Ka Jingkmen’ namar u kwah ban shna jingrwai ba kin sngewtynnad ki samla haba ki leit bamkhana, leit khawai bad ka la long shisha kaba ïaid ïew namar tang hapoh artaïew ka la dap shi million ki nongpeit.
U Bah Eibanroi u la ïathuh ba u la wanrah da ka Medaaihun ha kane ka jingrwai ‘Da Ka Jingkmen’ bad Marangbah ka dei namar u kwah ban pynkylla ïa ki puron.
Shuh shuh u la ïathuh ba ka jinglut bad ka jingmih na ka youtube ka kham slem hynrei u kwah ban pynpaw ïa ka sap lajong haba u la sdang ban rwai naduh dangrit.
Kumta u la kyntu ïa ki samla kiba donsap kim dei ban lehraiñ hynrei ki dei ban mih shakhmat ban pyni ïa ka sap lajong namar mynta kam don jingeh shuh haba la don ka youtube.
