Shillong, Rymphang 07
U Symbud Myntri Rangbah ka Jylla u Bah Sniawbhalang Dhar u la ong ba kam long satia ka bynta kaba biang ba lada don kino-kino ki mat pyrshah sorkar ban shu wan ïalam da ki paidbah hakhmat Secretariat.
U Bah Sniawbhalang u la ong, “Ngi don hangne ban trei ym ba ngi don hangne ban kynnoh ïano-ïano ruh namar ki jingkynnoh kin nym ïalam satia shano-shano ruh.”
“Lada ngi bteng ban shu ïa kynnoh ngin nym poi shaei-shaei ruh, lada ki don ki mat ba ïadei bad ka sorkar ym donkam ban wan ïalam ïa ki paidbah hakhmat Secretariat, namar ki lynti ki don bad ïa kiba lah ban pynbeit tang ha ka miej ïakren ym ha surok, bad phi dei ban kynmaw ïa kane,” la ong u Bah Sniawbhalang.
U Symbud Myntri Rangbah u la pynpaw ïa kane haba kren ha ka jingïalang buh mawnongrim ïa ka Wah Umkhrah Riverfront Development Project ba la pynlong ha ka Sngi Balang ha Second Ground, Polo.
U Bah Sniawbhalang u la ong, “U Myntri Rangbah ka jylla lem bad baroh ki Myntri Sorkar ngi la ïatrei shitom katba lah; hooid, ngin nym lah ban trei katkum ka jingkhmih lynti jong ki paidbah hynrei ngi dang pyrshang katba lah, kumta kum ki paid nongshong shnong nga kyrpad ba phin sngewbha ban ïai shah bad ngi ka sorkar.” Ha kaba ïadei bad kane ka projek ban pynitynnad ïa ki rud wah, u Bah Sniawbhalang u la ong, “Nga dap da ka jingkmen ba mynta ka sngi, ngi la lah ban buh mawnongrim ban sdang ïa ka projek kaba biang tam wat la kan dei tang ka jingsdang jong ka jingwanrah ïa ka jingpynkylla dur pynkylla dar hynrei kan sa long ka lynti sha uwei pat u mawjam.”
“Ngi kum ka sorkar ngi ju pyrkhat na ka por sha ka por kumno ban pynbit pynbiang bad pynlong ïa ka nongbah Shillong kaba khuid ba suba bad kaba itynnad, hynrei lada kum ki nongshong shnong kim shim lang ïa kane ka bynta kum ka jong ki ne ban ai ka jingïatreilang, kano kano ka projek sorkar kan nym poi shano shano,” la ong u Symbud Myntri Rangbah.
“Kan nym don jingmut lada ka sorkar ka trei katno katno ruh ban pynitynnad lada na ka liang jong ki nongshong shnong kim ai ka jingïatreilang, kumta nga buh ka jingkyrpad ban ai ka jingïatreilang, namar lada ym shim ïa kane ka projek kum ka jong lajong, ngin nym poi shaei-shaei,” u la ong.
