Shillong, Rymphang 07
U Myntri ka Sorkar Jylla u Bah A.L Hek uba dei ruh u MLA ka Pynthorumkhrah u la ong ba ha ki por jong ka jinglong khynnah, ki ju leit ban sum ban sleh ha ka Wah Umkhrah hynrei mynta wat tang ban peit ïa kane ka wah ruh ym i nud shuh.
U Bah A.L Hek u la kren bad pynpaw ïa kane ha ka jingïalang buh mawnongrim ïa ka Wah Umkhrah Riverfront Development Project ba la pynlong ha ka Sngi Balang ha Second Ground, Polo.
U Bah Hek u la ong, “Ha ki por ba ngi dang long khynnah, hadien ba ngi la dep ban ïalehkai phutbol ha madan Polo, ngi ju leit ban sum ban sleh ha ka wah Umkhrah, hynrei mynta pat tang ban peit ruh um i kwah shuh ne i nud shuh.”
“Nga ai khublei ïa ka Sorkar Jylla khamtam ïa u Myntri Rangbah ka jylla u Conrad K Sangma bad ïa u Myntri ka tnat Pynroi Sor u Bah Sniawbhalang Dhar kiba la shimkhia ïa kane ka kam wat la kan dei tang ka jingsdang kaba rit,” u la ong.
“Nga dap da ka jingsngewkmen ba la buh mawnongrim ban pynitynnad ïa ki rud wah Umkhrah, namar kum ki paidbah nongshong shnong ngi la mad ïa ka jingshlei um man la ka por, kumta ban lait na kine, donkam ïa ka Sorkar ban shimkhia halor ki katto katne ki lynti ïaid ki wah duid kiba wan ïasoh bad ka wah Umkhraw ne Umshyrpi,” la ong u Bah Hek.
Shuh shuh u Bah Hek u la ong, “Lada ïa kine ki jingwan tuid ki wahduid ban pynïasoh sha ka Wah Umkhrah ym lah leh eiei, ki nongshong shnong kin dang bteng ban mad ïa ka jingshlei um na ka por sha ka por. Ha u snem 2001 por ba don ka jingshlei um, ngi la kynthih ha um ban ïaleh ban pyllait im ïa ki briew, kumta ngim kwah shuh ba kum kane ka jingjia kan dang wan jia.”
