Mawkyrwat, Rymphang 07
U President ka NPYF State Meghalaya Unit u Bah Kitborlang Nongrem bad uba dei ruh u President ka NPP South West Khasi Hills District, u la ïathuh ba u MDC ka Congress na Mawkyrwat Constituency shen un sa pynïasoh noh sha ka seng NPP.
U Bah Kitborlang haba kren sha ki lad pathai khubor u la pynthikna ba u Bah Carnes Sohshang, MDC ka Mawkyrwat ryngkat ki nongkyrshan jong u, shen kin sa leit pynïasoh noh sha ka seng NPP.
Une u nongïalam ki samla jong ka seng NPP u la ïathuh ruh ba ha katei ka jingïalang bun ki ‘riew rangbah na kiwei pat ki seng saiñ pyrthei kiba um pat kwah ban pynpaw kyrteng ki la wan ban pynïasoh bad ka seng NPP kumjuh ruh ha kine ki khyndiat bnai bun ngut ki nongïalam jong ka seng TMC ki la wan ban pynïasoh noh ïalade bad kwah ban ai jingkyrshan ïa ka NPP.
Haba kylli halor ka jingwan pynïasoh u Bah Carnes Sohshang, u Bah Kitborlang Nongrem u la ïathuh ba ka la don ka jingïakren bad ym slem shuh un sa wan ban pynïasoh pura noh sha ka NPP.
U la ong ruh ba ka long kaei kaei kaba pynkmen ïa ki nongïalam jong ka NPP hapoh ka district namar ha katei kajuh ka sngi la ïoh ban pynlong artylli ki jingïalang jong ka Ranikor bad Mawkyrwat Block.
“Ka jingwan pynïasoh jong ki, ka la ai mynsiem shibun ïa ngi ki nongïalam kiba kwah pynkhlaiñ shuh shuh ïa ka seng,” u la ong bad bynrap “Ngi long kiba la kloi ban pdiang sngewbha ïa u Bah Carnes Sohshang bad ïa kiwei pat seng saiñ pyrthei kiba kwah ban pynïasoh bad ka NPP.”
