Shillong, Rymphang 07
Wat hapdeng ka jingduna ha ki bynta jong ka dkhot met hynrei haba don ka jingthrang bad ka jingangnud ban ïeng ha la ki jong ki kjat kan ym don satia kano-kano ka ban khanglad ïa ka jingkwah bad ka jingthmu kaba ki briew ki don.
U Bah Dispi Kharbuli u dei u briew uba shong ba sah ha Laitlyngkot bad u dei uba ju shna bad pynwandur ïa ki jait pa ki jait ki jait jingshna da la ki jong ki kti kiba kynthup naduh ki wait, ki tari, ki tala hyndai, ki shangkwai, ki shang, ki shawla bad kiwei kiwei de.
Haba ïoh ban ïakren bad u Bah Dispi Kharbuli ha ka prokram ïadie ïathied bad ka ïew pyninam ïa ki mar ki mata bad ki mar bam mar dih ne ka Prime Meghapreneur Expo 2024 ba la pynlong da ka sorkar mynta ka sngi bad ka ban sa kut ha ka Sngi Thohdieng, u la ong ba ka jingpynlong jong ka sorkar jylla ïa katei ka ïew, ka ai jingkyrmen shikatdei eh ïa u bad u kyrmen skhem ba ka sorkar nangne shakhmat kan dang ïai plie lad plie lynti ban kan pynlong ïa kum kine ki prokram khnang ba ki briew kiba kum ma u kiba seng kam lajong kin lah ban im bad kan long ruh ka lad ai kam ai jam ïa kiwei pat khamtam lei lei ha kane ka pyrthei kyrduh kam kyrduh jam.
“Nga kyrmen ba ka sorkar nangne shakhmat kan plie lad plie lynti ïa ngi khnang ba ngi ruh ngin im bad ngin lah ban ai kam ïa kiba bun ki khynnah samla khamtam ha kane ka pyrthei kyrduh kam”, la ong u Bah Dispi.
U Bah Dispi u la ïathuh ba ki don shibun ngut kiba u la ai kam bad kiba la ïatrei ryngkat bad u hynrei ki la don ruh pat kiba la sdang ban seng noh ïa la ka jong ka kam bad u la ïathuh ba u ju ai jinghikai lem ruh ïa kiwei pat ha kane ka kam.
U la ong ba ka jingsdang jong u ïa katei ka kam ka dei namar ba ym donkam donjam khamtam ba u duna ha ki dkhot met hynrei u la ong ba lada u shong khlem trei khlem ktah ha ïing, mano pat ban bsa ban btiah ïa u.
“Ka jingsdang jong nga ïa kane ka kam shna wait ka dei ba nyngkong eh bym donkam donjam khamtam ba nga long uba duna ha ka dkhot met, ba ngan shu pyrkhat ban shu shong kumto, mano ban bsa bad mano ban ai bam ïa nga”, la ong u Bah Dispi.
U la ïathuh ba dei u kpa jong u, uba la pynseng ïa iwei i karkhana barit bad hangta u Bah Dispi un sa lah ban pyntyllun bad pynïaid shakhmat ïa kane ka kam shna jingshna.
U Bah Dispi u la ïathuh ba u la trei ïa katei ka kam shna jingshna la 30 snem bad mynta kiba ju ïarap bad kiba ïatreilang bad u ki la don 15 ngut.
Shuh shuh u Bah Dispi u la ai mynsiem lang ruh ïa kiwei pat khamtam kito kiba biang ki dkhot met bad kiba kham samla ba kim dei ban khmih lynti than na ka kam sorkar hynrei haba ki biang ki kti ki kjat bad ki lah ban trei kano kano ka kam, kim dei ban pynlehnohei ïa ka sap kaba ki don bad u la ong ba ka jingkhmih lynti da kaba suk te kam ïahap hynrei ki dei ban trei shitom bad ban ïeng ha la ki jong ki kjat.
“Ka khubor jong nga ka long ba kine kiba biang ka met ka phad bad kiba kham samla kim da dei than ban khmih lynti tang na ka kam sorkar namar ki kti ki kjat ki don, ki lah ban trei kano-kano ka kam lyngba ka sap ba ki don, kim dei ban buhrieh ne ban tyngkai hynrei ki dei ban pynpaw pyrthei na ka bynta kaei-kaei ka jingmyntoi ïa ki hi lyngba ka jingtrei shitom jong ki”, la pynkut u Bah Dispi.
