Nongstoiñ, Rymphang 08
Ka seng Hynñiewtrep Youths Council (HYC) Nongstoiñ Circle ha ka Sngi Palei ka la ïoh ban bat noh ïa katto-katne ngut ki bar jylla kiba wan khaïi tin jot ha kawei na ki jaka ha Mawlangdep jong ka West Khasi Hills.
Ka seng hapoh ka jingïalam u samla Olivertwist Marngar uba dei u Organising Secretary bad samla Wilson Marthong Asst Secretary ryngkat bad ki nongkitkam ha katei ka sngi ki la lap ïa ki bar jylla kiba wan khaïi tin jot khlem kot khlem sla kiba biang. Hadien ba ki la dep ban khmih bniah, na ka liang ka seng ka la beh noh ïa ki bad ruh ban maham ba lada nangne shakhmat kin dang lap, ka seng kan leh da kaba tyngeh.
Shuh shuh na ka liang jong ki nongïalam ka seng ki la pynpaw ruh da kaba ong ba “Ka jaidbynriew jong ngi, ngi la lah ban khaïi tin jot, kumno ki bar jylla ki wan knieh noh ïa kane ka kam ruh.”
Ki la ong ruh ba ka HYC hadien ba ki la ïoh ban bat, ka la phah pynhap noh ïa ki tin jot bad ka HYC ka dawa ïa ki bor ka aiñ ba kim dei ban ailad laitlan ïa kum kine ki briew ban wan rung bad khaïi katba mon.
Nalor nangta, ka la kam ruh ba kane ka dei bad paw shai ka jingailad na ka liang ka tnat Infiltration bad ki pulit, hynrei lada kim ailad kumno ki bar jylla kin ïoh ban rung laitlan shapoh jong ka district.
