Shillong, Rymphang 08
Ka long kaei-kaei kaba sngewsih ba ka burom ka akor bad ka jingkheiñ kor ïa ka mynsiem briew ka la ïap ha kane ka juk ba mynta ha kaba na ka por sha ka por la ïohi ha ki lad pathai khubor ïa ka jingshah pynïap bad ka jingbret ïa ki khyllung kiba dang shu kha khlem kano-kano jingisynei.
Ha ka step jong ka 8 tarik u Rymphang ha ka por kumba 8 baje eiei, ki nonglum ñiut jong ka shnong Lumshyiap ki la lap ïa ka metïap jong iwei khyllung shynrang ba sdang syaid met bad bit da ka snam ha kaba la thep hapoh ka synduk juti bad ba la wan bret ha ka kali lum ñiut.
Na ka liang ki nonglum ñiut kiba la lap ïa katei ka metïap jong itei i khyllung da ka jingkyndit thret kumba ïuh tdong bseiñ, ki la pyntip noh ïa kane ka jingjia sha u Rangbah Shnong ka Lumshyiap. Na ka liang ka shnong ruh mar sien ïoh jingtip halor kane, ki la pyntip noh sha ki bor pulit ba kin leh ïa kaba donkam.
Haba ïoh ban ïakren bad u Rangbah Shnong ka Shnong Lumshyiap, u Bah Phira Khongphai, u la ïathuh ba ha ka step jong ka 8 tarik u Rymphang 2024, ki nonglum ñiut ki la pyntip sha u halor ka jinglap ïa itei khyllung ha ka kali lum ñiut bad na ka liang ka jong ki ruh mar-mar ki la shimkhia bad tohkit bniah halor kane ka jingjia.
U Bah Khongphai u la ïathuh ruh ba ka shnong ka la wad jingtip ba ki dang don tang 7-8 tylli ki ïing kiba kane ka kali ka la lum ïa u ñiut bad kata ruh ka dei ha ka dong Chandmari bad ka shnong ka la phah ban wad bniah la napdeng kitei ki ïing kiba la bret ñiut ki don ne em kiba dang shu ïoh khyllung. Hynrei, katkum ka jinglap jong ka shnong napdeng kine ki phra ïing ym don satia kiba kha khun bad kane ka la pynshaïong hi ngaiñ ïa ki nongïalam shnong kiba la pyrkhat mano bad naei la wan ban bret ïa itei i khyllung.
Shuh shuh u la maham da kaba tyngeh ba ka shnong ka la ai por hapoh 24 kynta ïa kiba donkti ban bret ïa itei i khyllung ban wan pyntip sha ka shnong. Lada kim wan hapoh ka 24 kynta, ka shnong lada ka lap ïa kino-kino kiba leh ïa katei ka kam sniew kan sa leh da kaba tyngeh ïa ki.
“Na ka liang jong ka shnong ngi la shu kyrpad ïa kito ki nongleh ba kin wan ban panmab na ka shnong katba ka shnong ka dang ailad, lada ki wan ban panmab ka dang don ka jingkyrmen na ka bynta jong ki bad da kaei ka lad ba ngin leh na ka bynta jong ki hynrei lada ki dang saitlah ïa kata hi, kan sa leh hi ka aiñ bad lada ka leh ka aiñ ngim lah shuh ban leh ei-ei”, la ong u Bah Khongphai.
U Bah Khongphai u la ong ba kum kane ka jingjia ka dang dei ka jingjia ha ka sien kaba nyngkong hapoh ka shnong bad ka long kaba sngewsih ban jia kum kane ka jingjia hapoh ka shnong ka thaw.
Na ka liang u Bah Khongphai u la kyntu ruh ïa ki khynnah samla ba lada ki armet bad ki tieng ban ïathuh haïing hasem kim dei satia ban bret ïa ki khyllung hynrei ki dei ban leit sha ki jaka sumar ne sha ki riewshimet kiba don byllai kiba kwah khyllung.
U la ïathuh ruh ba ka shnong kan ym shongthait, hynrei kan ïai wad bad rung sha man la ki thliew ïing ban lap ïa kiba leh ïa kum kane ka jait kam.
Kum ban shu pynkynmaw hangne, dang ha kine ki khyndiat bnai ba la dep ruh ki la don ki jingjia bret khyllung ha kaba kawei ka dei kaba la jia ha ka shnong Mawpat ba la lap ïa ka metïap jong iwei i khyllung na ka kali kit ñiut bad kawei pat ka dei ha Wahumkhrah, Ïewrynghep ha kaba la bret ïa iwei i khyllung hapoh katei ka wah bad kaba la per halor ka sla um.
