Shillong, Rymphang:
Ka Monolith Festival ka ban long mynta u snem ha Khasi Heritage Village kaba la shna pynitynnad ha Mawphlang, East Khasi Hills District kan kham khring ïa ki paidbah namar ka Khasi Hill Autonomous District Council (KHADC) kan pyndep noh kloi ïa ka pung jngi ne Swimming Pool kaba la shna hapoh ka jingkieng doi-doi.
Ïa kane ka Monolith Festival 2024 ka ban pynïaid da ka KHADC bad ka Tnat Jngoh Kai Pyrthei jong ka sorkar jylla ryngkat ka jingïatreilang bad ka Hima Mawphlang kan sdang naduh ka 22 tarik haduh 24 tarik u Rymphang, 2024 ha katei ka jaka kaba don mar syndah bad ka ‘law kyntang.
Kane ka tamasa kan kham shongshit mynta u snem naduh ba la pynlong khatduh ha u snem 2016 bad kaba la sdang pynlong nyngkong ha u snem 2013. Haba ïa dei bad ka jinglut jingsep, la ong mynta u snem kan kham bun ban bei tyngka da ka Tnat Jngoh Kai Pyrthei jong ka jylla hynrei ha kane ka tamasa la shah kylluid ïa ki paidbah khlem donkam siew bai rung namar la pynlong na ka bynta ban pynriewspah ïa ka riti dustur jong u Khasi.
Haba buddien ïa ka jingpynkhreh ïa ka Monolith Festival ha Khasi Heritage Village ha Mawphlang, la ïohi ba ki nongtrei ki dang bunkam ban shna ïa ka rynsan rwai bad shad tynrai ha ka madan kaba la ker sawdong da ki kynroh maw ban shong ki paidbah.
Nangta la ïohi ba ki nongtrei ki dang bunkam ban khoh ïa ki siej na bynta ban tap phlang ïa ki basa ban die ïa ki tiar ki bym pyut ha madan jong ka Khasi Heritage Village.
Shuh shuh la lap ba ki ïing trep jong ki hima Khasi ki la iphuh-iphieng hadien ba la dep shna thymmai ban ker da ki siej bad tap da ki phlang bad ki tynriew.
Ha bynta kaba kut jong kane ka jaka la ïohi ba ka KHADC ka la pynbha ïa ka jingkieng doi-doi bad shapoh ka la shna pynitynnad da ka pung jngi kaba heh bad ha syndah jong kane ka pung jngi la lah ruh ban pyndep ïa ka jaka buh sahnam.
Katba ïa ki dukan sha, dukan ja bad ki jingbam tynrai la pynkhreh ban die ha madan kaba don syndah bad ka ‘law kyntang.
Haba ïoh ban ïakren bad katto-katne ngut ki nongtrei ïa ki basa kiba la shna ha Mawphlang ki la ïathuh ba ki la sdang naduh ka 1 tarik mynta u bnai (Rymphang) bad ki hap ban pyndep beit hapoh ka 22 tarik jong ujuh bnai shwa ban sdang ka tamasa.
Nalor kata, ki la ïathuh ba ïa ki siej la wanrah na ki thaiñ Ribhoi bad la khoh bha ban kin bat skhem haba teh ïa ki ban skhem haduh ban da kut kane ka tamasa.
