Jowai, Rymphang 08
Ka Kong Santa Mary wat la ïalade ka dang long MLA tang kumba khatwei bnai tam hynrei kam shym la khynñiuh wat tang khyndiat ruh ban kynthoh ïa u Bah Vincent H Pala uba la long MP la 15 snem lynter haduh mynta.
Kane ka MLA kynthei ba marwei na Rilum Jaiñtia kaba dei na ka Sutnga Saipung konstitwensi ka la pynrem kput ruh ïa u Bah Pala ha ka ileshon MLA ba dang shu dep long mynshem snem.
Ka Kong Santa ka la kynthoh ba ha ki 15 snem ka jinglong kum u MP jong u, kam pat juh ïohi ba u Bah Pala un kren hapoh Parliament bad lada kam bakla dang lah ban ñiew ba u kren tang lai ne saw sien kata ruh ba la jan ka ilekshon.
Ïa kane ka jingkren, ka MLA ka Sutnga Saipung ka la pynpaw ha ka jingïalang pynithuh bad pan jingkyrshan ban pynjop ïa ka Kong Ampareen Lyngdoh ha ka ilekshon MP kaba la pynlong da ka NPP 2-Jowai Block ha Ladthadlaboh Indoor Hall ha ka 8 tarik Rymphang.
Haba bteng ïa ka jingkren, ka MLA Sutnga ka la ong, “Ngim don ïa u MP uba lah ban kren hapoh Parliament na ka bynta ka roi ka par bad ka bha ka miat jong ka jaidbynriew.”
“U MP jong ngi um pat juh kren hapoh Parliament bad da ngam bakla dang lah ban ñiew ba u kren tang lai ne saw sien kata ruh ba la jan ka ilekshon”, la ong ka Kong Santa.
Namar kata, ka la kyntu ïa ki spah ngut ki nongkyrshan jong ka NPP kiba wan ïashim bynta ha ka jingïalang ba kin jied ïa ka Dr. Mazel Ampareen Lyngdoh kum ka MP jong ka Shillong Parliamentary Seat namar kadei ka ‘riew kynthei kaba trei shitom bad kaba shlur ban kren na ka bynta kino-kino ki ki mat ki jura jong ka Jylla bad ka jaitbynriew.
