Jowai, Rymphang 08
Wat tang hapoh District Council ym pat ïoh ban synshar kumno phin khmih lynti kat shapoh Parliament, balei ka Jowai Constituency kan biej haduh katta, kynthoh u Bah Sniawbhalang Dhar pyrshah ïa u Prah.
Ïa kane la kynthoh da u nongïalam ka NPP u Bah Sniawbhalang Dhar uba long ruh u Symbud Myntri Rangbah ka Jylla haba kren ha ka jingïalang pynithuh ïa ka Kong Ampareen Lyngdoh kaba dei ka kyrtong MP na Shillong Parliamentary Seat.
Ïa kane ka jingïalang pynithuh bad pan jingkyrshan ban pynjop donburom ïa ka Kong Ampareen Lyngdoh ha ka ilekshon MP, la pynlong da ka National Peoples Party 2-Jowai Block ha Ladthadlaboh Indoor Hall ha ka 8 tarik Rymphang.
Haba bteng ïa ka jingkren u Bah Sniawbhalang Dhar u la ong, ïa u Prah ym donkam ban beh, u Prah un sa phet hi dalade.
U la kynthoh ruh ïa ka jingpyrshah jong ka VPP ïa ka jingkren Hindi u Lat ka Jylla, u la ong kumba long mynta ka mih ka ishu ba lada kren u Lat da ka ktien Hindi kin pyrshah bad u la kyntu ïa ki nongkyrshan ka NPP ban rah ïa kane ka khubor sha ki shnong ki thaw jong ki, ba hapoh Parliament kim kren da ka ktien Nongkrem ki kren da ka Hindi.
U Bah Sniawbhalang u la kynthoh ruh ïa u Prah da kaba ong, ba u Prah kat shaba leit ïalap ilekshon u ong para jaidbynriew para jaidbynriew, Hato ngi ngim ieid jaidbynriew? Ka ktien nongwei ka ong ‘Respect yourself but don’t hate others’ ne burom ïalade bad wat isih ïa kiwei.
“Ngam kynnoh ba u Bah Vincent u long uba sniew hynrei ha ka jinglong MP ka jong u kaba 15 snem u long kum uba ïap hapoh Parliament khlem lait kren,” la ong u nongïalam ka NPP u Bah Sniawbhalang Dhar.
U Bah Sniawbhalang haba bteng ïa ka jingkren, u la kynnoh ba ka jingkren jong u MP ha kine ki shisngi arsngi hapoh Parliament ka dei ba la jan ka ilekshon.
Kumta ruh u Bah Dhar u la kyntu ïa ki nongkyrshan, haba jied ïa ki nongïalam ym dei ban ong ba dei para Balang lane para Jaiñtia hynrei buh ka jingduwai ban ïoh ïa u ne ka nongïalam kaba trei hok.
