Jowai, Rymphang 08
Ka Kong Ampareen Lyngdoh ha ka 8 tarik Rymphang ka la hiar sha ki artylli ki konstitwensi jong ka Rilum Jaiñtia kata sha Nartiang bad Jowai Konstitwensi ban pynithuh ïalade bad ban pan ka jingkyrshan ban pynjop donburom ha ka ilekshon sha Lok Sabha.
Ïa ka Kong Ampareen Lyngdoh la synrang da u Bah Sniawbhalang Dhar uba dei u Symbud Myntri Rangbah ka sorkar jylla bad nongïalam ka NPP, ka Kong Santa Mary Shylla MLA Sutnga Saipung konstitwensi, u Bah Wailadmiki Shylla MLA ka Jowai, u CEM ka JHADC, u Bah Thombor Shiwat, u State Working President u Bah Hamletson Dohling nalor kiwei kiwei.
Ïa ka jingïalang kaba la long ha Wahïajer la pynïaid da u Bah Hamkom Khyriem President 1-Nartiang Block katba ïa ka jingïalang ha 2-Jowai konstitwensi la pynïaid da u Bah Darilang Lamare President 2-Jowai Constituency.
Ka Kong Ampareen Lyngdoh haba ai jingkren ka la pynpaw ka jingsngewnguh ïa baroh ki dkhot bad nongkitkam ka NPP na ki artylli ki Block kiba la wan sha ka kane ka jingïalang.
Ka la kular hakhmat ki spah ngut ki dkhot bad nongkitkam ka NPP ban trei hok bad ban bud ïa ki dienjat kiba u kpa jong ka, u Bah Peter Marbaniang (Bam Kwai ha Dwar U Blei) u la ïalam lynti ha ka por ka jinglong MP ka jong u.
“Jied ïa nga kum ka MP ka jong phi ngan pyrshang katba lah ban pynbit pynbiang bad wanrah ki jingdonkam jong ka Jylla sha ka sorkar pdeng la ka dei ki skhim bapher bapher ne kiwei kiwei ki jingdonkam khlem da leh shilliang la ka long ha ka niam ne kiwei kiwei”, la ong ka Kong Ampareen.
Ka Kong Ampareen ka la kyntu ruh ïa ki MDC ka JHADC ba kin jied ïa ka kum ka nongmihkhmat sha ka sorkar pdeng bad ba kan ïasaid ïa ka jingeh jong ki khamtam ha kaba ïadei bad ki skhim kiba wan lyngba ka sorkar pdeng.
