Shillong, Rymphang 08
Katkum ka khubor na ki pulit, u Gyan Bahadur Gurung u la ujor ba ha ka 1 tarik Rymphang, ki runar ki la leit prong sha ka ïing sah jong u ha AG Quarters ha Lumpyngngad bad ki la tuh ïa kawei tyndong lyer shet (LPG Cylinder) bad kiwei ki mar.
Sa ha kawei pat ka jingjia kaba ïasyriem, u Situ Ram Das u la ujor ba ha ka 4 tarik Rymphang ha ka por janmiet, ki runar ki la leit prong ha ïing sah jong u ha AG Quarters, Lumpyngngad bad ki la tuh ïa kawei tyndong lyer shet (LPG Cylinder).
Ha kawei pat ka jingjia, ka Babyka B Marak ka la ujor ba ha ka 24 tarik Kyllalyngkot, ka ar shaka jong ka (ML-08G-4692) ka la jah na Akonggre, Tura.
Nalorkata, ki pulit ki la pyntip ba u Sengman A Sangma u la ujor ba ha ka 31 tarik Kyllalyngkot ha ka por kumba 4 baje mynstep, ki runar ki la tuh ïa ka thuk-thuk jong u (ML-08H-0262) na Tetengkol, Tura.
Nangta sa ha kawei pat ka jingjia, u Prosen K Marak u la ujor ba ha ka 6 tarik Rymphang, ka kali jong u (AS-01X-9187) ka la jah na ka jaka ba la pynïeng harud surok ha Chitoktak kaba hap ha thanat Tura.
Ha kawei pat ka jingjia, u Alinash Ch Marak u la ujor ba ha ka miet jong ka 4 tarik Rymphang, ki runar ki la tuh ïa 16 tylli ki Battery kiba shongdor kumba T. 3.68 lak na Rangsakona Deficit Secondary School, South West Garo Hills.
Shuh shuh ki pulit ki la ïathuh ba u EE (PHE) & Member Secretary ka DWSM, South West Garo Hills u la ujor ba ha ka miet jong ka 1 tarik Rymphang, ki runar ki la tuh ïa ki sainar bording na Konapara, Gangikona.
