Shillong, Rymphang:
U Nongïalam ka Liang Pyrshah ka ïingdorabr thawaiñ ka Jylla, u Bah Ronnie V Lyngdoh, u la ong ba ka rai ba la shim da ka Sorkar Jylla ban pynjlan da 6 bnai ïa ka samoi treikam jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) ka long kaba biang bad kaba donkam bha.
Haba kren bad ki lad pathai khubor ha ka Sngi Ba-ar, u Bah Ronnie u la ong, ka rai ba la shim da ka sorkar ka long kaba biang bha namar kumba ka long mynta, ka la don kumba 30 snem tam eiei ba kam shym la don satia ka jingpynbeit ïa ki MDC konstitwensi (delimitation) hapoh ka KHADC bad JHADC.
U Bah Ronnie uba dei u MLA ka Congress na Mylliem u la ong, kumba ka long mynta ki la don bun ki konstitwensi kiba la ïapher bak-ly-bak kawei na kawei, la ha ka jingheh ne ka jingdon jong ki briew ne ki nongthep vote, ha kaba ki don ki konstitwensi ha kaba ka jingdon ki nongthep vote ka la long haduh ar ne lai shah ïa kawei ka konstitwensi bad u ai nuksa ruh kum ka Laban konstitwensi ka don tang 12000 tam eiei katba ka Mawlai pat ka don palat ïa ka 500000 tam.
Nalor ka jingbun ki nongthep vote, u Bah Ronnie u la ong, lada peit ha ka liang ka jingheh ne ïar ki konstitwensi ruh la donkam ban pynbeit da kaba ai nuksa ba ka shnong Lumparing ha ka ilekshon MLA ka hap sha ka South Shillong katba ha ka ilekshon MDC pat ka hap sha Laitumkhrah.
“Lada phi peit ka Laitumkhrah MDC Konstitwensi ka treikam naduh Lumparing shaduh Siejliej, ka bym ïahap shuh namar ka la kynthup ïa ki saw tylli ki MLA konstitwensi ba kynthup ïa ka South Shillong, ka East Shillong, ka Mawryngkneng bad ka Pynthorumkhrah Konstitwensi,” la ong u Bah Ronnie.
Haba kylli halor ka jingkynthoh ka Voice of the People Party (VPP) ba ka jingpynjlan ka dei namar ka Sorkar ka don ka jingtieng ban pynlong noh mynta ïa ka ilekshon MDC, u Bah Ronnie u la ong, “Kam dei ka sien ba nyngkong ba pynjlan ïa ka samoi treikam ki District Council haba ai nuksa ïa ka jingpynjlan ïa ka GHADC bad kane kam mut satia ba ka Sorkar ka tieng.”
U Bah Ronnie u la ong, kam pher lada ka sorkar kam lah ban pynlong ilekshon mynta, lashai te kan hap ban pynlong beit, kumta kam don satia ne mih kata ka jingkylli ban ong ba ka Sorkar ka tieng.
