Nongpoh, Rymphang 08
Ki pulit ka Ri Bhoi District ha ka step Sngi Palei ki la ïoh ban kem noh ïa ar ngut ki suba nongkhaïi drok kiba dei na Assam bad na ka met jong ki la ïoh ban kurup ruh ïa u drok.
Katkum ka khubor ba la ïoh lum la ïathuh ba ka jingïoh kem ïa kitei ar ngut ka la long hadien ba ki pulit ki la ïoh ïa ka jingtip kaba thikna lyngba ki bor syntiat ba ki don ki briew kiba khaïi ïa ki jingdih pynbuaid bad mar kumta ki la pynlong ka jingap thap ha ki bynta jong ka surok bah National Highway 6 ha Mawtnum, mar pyrshah bad ka Excellencia Restaurant.
Kitei ar ngut kiba la shah kem ki dei ba la tip kyrteng kum u Sumit Naha bad u Rahul Ghosh. La kem ïa kine na ka bos Night Super kaba don ïa u number ML05-T-8121.
Hadien ba la kem ïa kitei ki briew, na ka liang ki pulit ki la pynlong ïa ka jingtalasi ha kaba la ïoh ban kurup kumba ar tylli ki synduk sabon kiba la thep ïa u drok Heroin uba don ka jingkhia kumba 21.05 gram, 8 tylli ki bilor rit ryngkat ar tylli ki mobile phone bad uwei u thyrnia injek na ka met jong kitei ki briew kiba dei ki nongshong shnong jong ka Dibrugarh na ka jylla Assam.
Haba ïadei bad kane ka jingjia ki pulit ka Ri Bhoi ki la pynrung case ha thanat Nongpoh bad mynta ki dang pynlong ruh ïa ka jingtohkit kaba jur ban lapdien ïa kiwei pat kiba donkti ha kane ka kam khaïi beaiñ ïa u drok.
