Shillong, Rymphang 08
Ka North Eastern Council (NEC) ka la dep mynjur kumba T.10 klur eiei na ka bynta ban pynitynnad ïa ka Ïewduh ha kane ka nongbah bad kaba dei ruh kawei na ki jaka khaïi kaba heh ha kane ka Jylla nalor kiwei ki projek.
Ïa kane la ïathuh da u Secretary ka North Eastern Council (NEC) u K Moses Chalai haba batai shaphang ki projek kiba bun kiba bei pisa da ka Sorkar Pdeng lyngba ka NEC ha Meghalaya.
U la ong ba ka projek ban pynitynnad ïa ka Ïewduh ka la don lypa namar la dep ban mynjur, bad kaba sah ka long ban pyllait ïa ka pisa na ka bynta kane.
U Chalai u la ïathuh ruh ba ïa ka pisa lah ban pyllait noh hapdeng 2 ne 3 bnai bad ïa kane ka projek yn pyntreikam da ka Sorkar Jylla.
Ki don ruh kiwei kiwei ki projek kiba la mang lyngba ka NEC nalor ki projek shna surok bad kiwei kiwei kiba la mang lyngba ka North East Special Infrastructure Development Scheme (NESIDS).
