Shillong, Rymphang 08
U Myntri Rangbah ka jylla u Conrad K Sangma ha ka Sngi Palei u la plie ïa ka Jackfruit Processing Unit ne ka jaka saiñ ïa ki jingbam bapher bapher na u Sohphan, ha Gulpani Nokat, Rongara kaba ha South Garo Hills.
Haba plie ïa kane ka jaka, u Myntri Rangbah u la pyntip ruh ba ka Sorkar ka don jingthmu ban plie sa ïa kiwei jaka saiñ jong ki soh bapher bapher hapoh ka Jylla.
Haba pynpaw ïa ka jingkmen ban ïoh plie ïa ka Jackfruit Processing Unit ha ka thaiñ, u Myntri Rangbah u la ong, kane kan ym kut tang ïa u sohphan hynrei ka sorkar ka don ïa ka jingthmu ruh ban plie ïa ki jaka saiñ na ka bynta kiwei kiwei ki jait soh, ki jhur ki jhep ha kylleng ka Jylla.
U Conrad u la pyntip ba kumba T.1.5 lak haduh T.2 lak u Sohphan yn thied na ki paidbah manla ka sngi ha kaba yn sa saiñdur bad song bha ïa ki hadien ba la shna ïa ki ha ki jait jingbam bapher bapher kum ki chips, ata, jam bad kiwei kiwei bad kumba 150 ngut ki kynthei kin ïoh jinghikai bad ïoh kam, bad lyngba kane ka projek yn pynmih haduh kumba 20 jait ki jingbam na u Sohphan ka Meghalaya.
“Nga dap da ka jingkmen ban pyntip sha phi ba ngi la ïoh lypa ïa ki nongthied na ri Russia bad na ka dewbah Europe ba ki kwah ban thied ïa ki jait jingbam kiba pynmih na u Sohphan bad kane ka long ka jingkmen bad ka jingsngew sarong ïa ngi baroh,” la ong u Conrad.
Ha kajuh ka por u la pyntip ba ka Meghalaya ka don kyrhai ïa ki soh bad ki jhur hynrei ki paidbah kim shym la ïoh pat ban kheit ïa u soh jong ka jingïohnong na kitei ki jait soh bad jhur kiba la shu kylla long lehnohei noh.
Ban kyntiew ïa ki nongrep, ka Sorkar ka la pynmih bad sdang ïa kiba bun ki prokram kata da kaba ïaid da ka mission khnang ba ki nongrep kin lah ban kamai arshah ha ka ïoh ka kot ka jong ki bad bun ki mission kum ka Lakadong Mission, Ginger Mission, Jackfruit Mission.
Ha kaba ïadei bad katei ka Jackfruit Processing Unit ba la plie, u la pyntip ba la shna ha ka jinglut kaba kot T.2 klur bad la pynïaid ïa ka lyngba ka bording solar kaba kot 100 KW bad kane kala plie lad ban ïoh ïa ka bording kaba khuid bad ban pynneh ïa ka mariang.
“Kane ka jaka saiñ ka dei kawei na ki jaka saiñ kaba bha tam hapoh ka jylla bad ka dei kaba la paw ha ka Architecture Review ba ka dei ka Top 15 Sustainable Design ha ka pyrthei. Kane ka shnat kan kylla long ruh kum ka community hall ne ka jaka sah na ka bynta ki nongshong shnong lada jia ba wan lynshop ka bor mariang.
U Conrad u la ong, “Ngi don ïa ka thong ba kane ka jaka saiñ kan wanrah ïa ka jingkylla na ka bynta ki 5000 ngut ki nongrep bad ban aikam aijam ïa ki samla ha kylleng ka rilum Garo.”
Shuh shuh u la pyntip ba ki don 440 tylli ki Integrated Village Cooperative Societies bad 28 tylli ki Organic Farmer Producer Organisations bad T.78.5 klur ka jingshongdor jongki jingtei kiba la tei ha kylleng ka jylla ha kaba ïadei bad ka kam rep kam riang bad ka sorkar ka ïengskhem ban kyntiew ïa ka jingïohnong ki nongrep ha ka jylla.
U Myntri Rangbah u la pynpaw ruh ïa ki katto katne ki kam pynroi na ka bynta ka South Garo Hills bad kaba kham kongsan ka dei ka Ranikor-Rongara-Baghmara Road kaba la jan dep shna lut, ka jingtei ïa ka projek kam pynroi ha Baghmara bad ka jingsdang ïa ka Science bad Commerce Stream ha Captain Williamson Sangma College, Baghmara ka ban ai jingmyntoi ia ki samla pule jong ka South Garo Hills.
Ha kane ka sngi plie la ïadon lang u Myntri ka tnat pule puthi u Rakkam A Sangma uba long ruh u MLA ka Rongara-Siju, bad u MLA ka Baghmara u Kartush R Marak, u MLA ka Amlarem uba long ruh u Chief Advisor jong ka sorkar u Bah Lakhmen Rymbui, u CEM ka GHADC u Albinush Marak lem bad kiwei kiwei.
