Shillong, Rymphang 08
Ka seng Voice of the People Party (VPP) ka la nang ïoh bor bad nang khlaiñ ha kaba ha ka 8 tarik u bnai Rymphang 2024, la ïohi ba ki nongkitkam ka seng Hill State People’s Democratic Party (HSPDP) hapoh ka jingïalam jong u President ka HSPDP Youth Wing ki la leit ban pynïasoh sha ka seng VPP.
Kitei ki nongïalam ka HSPDP kiba la wan ban pynïasoh bad ka seng VPP ki don haduh 30 ngut bad ki dei kiba na Nongstoiñ, Umsning, Sohïong bad kiwei kiwei ki jaka.
La pdiang sngewbha ïa kitei ki 30 ngut ki nongïalam ka HSPDP da u President rangbah ka seng, u Bah Ardent Miller Basaïawmoit, u General Secretary, u Dr. Ricky AJ Syngkon, u MLA ka Mawlai, u Bah Brightstarwell Marbaniang, u Vice President, u Dr. Cara Chen ha ryngkat bad kiwei kiwei ki nongïalam ba hakhmat jong ka seng.
Haba ai jingkren ha katei ka sngi, na ka liang u Bah Ardent Basaïawmoit, i la ong ba kino-kino kiba wan rung bad kiba pynïasoh sha ka VPP ki dei ban ai ba ki jingmut jingpyrkhat jong ki ba kan long kaba beit bad kaba sngur namar kum ka seng kam kwah ba lada ka seng ka la khlaiñ bad ka la pdiang bad kdup ïa kat kiba wan kin mih pat sa ki jngïakynthoh hapoh ka seng.
“Shwa ban rung, ngi kwah ba ki briew kin shai shwa bad ki dei ban wan da ki jingmut kiba sngur bad ba kin ïohi ïa ki nongrim bad ka thong jong ka VPP”, la ong u Bah Ardent.
U la ong ba ka lyer jong u prah ka kaweh kat shaba leit hynrei kum ki nongïalam kim pynshongshit ïalade kumba shongshit ka lyer namar kin don shibun ki ban wan sha ka seng khlem da sngewthuh pat ïa ka nongrim bad ïa ka lynti kaba ka VPP kan ïaid namar ba ka sienjam ba ka VPP ka la rai ban ïaid ka long ka sienjam kaba eh bha kata ban wanrah ïa ka synshar ka khadar kaba khuid, ban pynbna ïa ka thma pyrshah ïa ka bamsap, ka jingduk, ka jingleh shiliang.
“Ngi sngewthuh ïa ka lyer jong u prah kat shaba leit tangba kum ki nongïalam ngim pynshongshit ïalade kumba shongshit ka lyer namar ngi sngewthuh ba lada ngi pynshongshit kumba shongshit ka lyer, kaba sheptieng ka long ba kin bun kiba wan sha ka seng jong ngi khlem da sngewthuh ïa ka nongrim bad ïa ka lynti kaba ngin ïaid kan long kumno”, la ong u Bah Ardent.
U Dr Ricky AJ Syngkon u la ong ba watla ka seng VPP ka dang long khyllung ha ka rta ka jingïaid lynti ha ka saiñ pyrthei hynrei kum ki nongïalam pat ki sngew ba ki la ih bad ki la sngewthuh bha ïa ka saiñ hima sima kaba ka seng ka ju ïakren.
U la ong ba ka VPP kam dei tang ka seng ban ïaleh ïa ka ilekshon hynrei ka dei ka seng ka ban saiñdur ïa ka jaitbynriew ha ka pyrkhat pyrdaiñ, ka akor ka burom, ka synshar ka khadar.
Katba na ka liang u Bah Sandondor Ryntathiang, u la ong ba ka jingrung jong kitei ki 30 ngut sha ka VPP ka dei halor kajuh ka nongrim kaba ki don bad u la ong ba lyngba ka jingwan rung jong kitei ki 30 ngut sha ka VPP kan ktik lem ïa kiwei pat ki nongkitkam jong kiwei ki seng saiñ pyrthei ki ban rung sha ka VPP.
